Qazaqstanda aldaǵy jyly halyqaralyq «Kınotavrık» balalar festıvali ótkizilýi yqtımal
ALMATY. 17 qarasha. QazAqparat /Názıra Eleýhan/ - Sochıde ótken balalar baıqaýynan kelesi jyly sáýir aıynda Qazaqstanda H halyqaralyq «Kınotavrık» balalar festıvalin ótkizý týraly usynys alyp keldik.
Búgin Almatyda ótken arnaıy baspasóz máslıhatynda «Tańsári» mıýzık-shoý teatrynyń jetekshisi Dına Smaılova osylaı málim etti.
Onyń aıtýynsha, uıymdastyrýshylardyń usynysy endi qala ákimdigine jáne basqa qurylymdarǵa habarlanbaq.
«Baıqaý óte qymbat shara, tipti reseılikter úshin de. Oǵan kópshilik ujymdardyń qatysýyna múmkindikteri bola bermeıdi. Eger usynys qabyldansa, bul otandyq basqa da balalar teatrlaryna, shyǵarmashylyq úılerge kásibı dárejedegi baıqaý bolyp sanalatyn halyqaralyq óner jáne sport «Kınotavrık» festıvaline qatysýǵa múmkindik týatyn úlken shara. Ne bolsa da baıqaýdy ótkizýdi josparlap otyrmyz. Bul baıqaýǵa tek kásibı ádilqazylar men kásibı dárejedegi, júzden júırik, myńnan myqty shyqqan, «úlgili» ujymdar qatysa alady. Bul oraıda aıta ketetinim, bizde balalar stýdııalaryna, teatrlarǵa «Úlgili ujym» degen sııaqty ataqtar berilse. Bizde balalarmen jumys isteıtin shyǵarmashylyq ujymdardyń jumysyna baǵa beretin, saraptap, marapattaıtyn esh shara joq. Árkim óz qazanynda qaınap jatyr. Bul usynysym qala ákimdigine, mádenıet mınıstrligine «altyn syrǵa» bolsa deımin», - dedi Dına Smaılova.
