Qazaqstanda aldaǵy jyldary 12 myń shaqyrym avtojol salynady

NUR-SULTAN. QazAqparat – 2021-2025 jyldar aralyǵynda respýblıka boıynsha 12 myń shaqyrym avtjol salý josparlanyp otyr, dep habarlaıdy QazAqparat tilshisi.

Bul týraly Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda aıtty.

«Elimizde avtojoldardyń jalpy uzyndyǵy 96 myń shaqyrymdy quraıdy. Onyń ishinde 25 myń shaqyrymy – respýblıkalyq mańyzy bar kúre joldar, 71 myń shaqyrymy – jergilikti joldar.

2021-2025 jyldar aralyǵynda avtojol salasynda respýblıkalyq mańyzy bar 12 myń shaqyrym avtojol salynyp, rekonstrýktsııalanady. Jyl saıyn 200 myń adam jumyspen qamtylady», - dedi vedomstvo basshysy.

Onyń aıtýynsha, búginge deıin eldegi respýblıkalyq mańyzǵa ıe joldardyń negizgi bóligi kúrdeli jóndeýden ótip, 13 myń shaqyrym avtojol qaıta jańartylǵan.

«Bıyl respýblıkalyq joldardyń 4,7 myń shaqyrymynda jol-qurylys jumystary júrgiziledi. 3,6 myń shaqyrym avtojol salynyp, qaıta jańartylyp jatyr. Jyl qorytyndysynda 2,2 myń shaqyrym avtojoldy paıdalanýǵa berý, 1,2 myń shaqyrym joldy ashý josparlanǵan. 1,1 myń shaqyrym jolda ortasha jáne kúrdeli jóndeý jumystary júrgizilip jatyr», - dedi mınıstr.