Qazaqstanda aldaǵy úsh jylda 9 sý qoımasy salynady

NUR-SULTAN. QazAqparat - Elimizde 2025 jylǵa deıin qosymsha sý kólemin qamtamasyz etý úshin 9 jańa sý qoımasy salynady. Bul týraly QR Ekologııa, geologııa jáne tabıǵı resýrstar vıtse-mınıstri Serik Qojanııazov málim etti, dep habarlaıdy QazAqparat tilshisi.

«Elimizdegi 8 sý sharýashylyǵy basseıniniń 7-ýi – transshekaralyq. Sý jetkizýde klımattyq faktorlardan bólek, tranasshekaralyq elderdiń sý sharýashylyǵy tájirıbesi áserin tıgizedi. Mundaı jaǵdaıda sý ekojúıeleriniń qajettiligi qaldyq prıntsıpi boıynsha qanaǵattandyrylady. Aral men Balqashqa qatysty problemanyń basty sebebi osynda. Elimizde sýdy paıdalaný tıimdiligi tómen. Aıtalyq, bir ónimge Reseı men AQSh-qa qaraǵanda 3 ese, al Avstralııaǵa qaraǵanda 6 ese kóp sý jumsalady», - dedi Serik Qojanııazov elordada ótip jatqan «ECOJER» ІІ halyqaralyq ekologııalyq kongresi barysynda.

Sondaı-aq vıtse-mınıstr sý sharýashylyǵyna qatysty máseleler «Jasyl Qazaqstan», «Qýatty óńirler – el damýynyń draıveri» ulttyq jobalary jáne 2025 jylǵa deıingi agroónerkásiptik keshen aıasynda sheshiletinin atap ótti.

«Qosymsha sý kólemin qamtamasyz etý úshin 2025 jylǵa deıin sý qory 1,7 tekshe shaqyrymdy quraıtyn 9 jańa sý qoımasy salynady», - dep tolyqtyrdy spıker.

Odan bólek, mınıstrdiń orynbasary Prezıdenttiń tapsyrmasyna sáıkes jańa Sý kodeksin ázirleý boıynsha jumystardyń júrip jatqanyn habarlady.

Onyń aıtýynsha, jańa Sý kodeksi elimizdegi sý resýrstaryn saqtaýǵa jáne ony únemdi paıdalanýǵa múmkindik beredi.

Buǵan deıin vıtse-mınıstr 2030 jylǵa qaraı Qazaqstanda sý resýrstarynyń tapshylyǵy bolýy múmkindigin málim etken edi.