Qazaqstanda aldaǵy úsh kúnde jańbyr jaýyp, kún salqyndaıdy
ASTANA. QazAqparat - Sınoptıkter 21-23 shilde kúnderiniń aýa raıy boljamyn usyndy, dep habarlaıdy «Qazgıdromet» RMK.
«Qazaqstannyń soltústik-shyǵys jáne shyǵys oblystaryna joǵarǵy tsıklon jyljyp, osy aımaqtarda jeksenbi jáne dúısenbi kúnderi jańbyr jaýyp, keı jerlerge burshaq túsedi. Kúshti jel soǵyp, aýa temperatýrasy tómendeıdi», - delingen habarlamada.
Osy tsıklon respýblıkanyń soltústik, ortalyq, ońtústik jáne ońtústik-shyǵys oblystaryndaǵy aýa raıyna yqpal etedi.
«Munda keı jerlerde naızaǵaı oınap, burshaq túsedi. Ótkinshi jańbyr jaýyp, jyldamdyǵy 15...23 m/s bolatyn jel soǵýy múmkin. Aýa temperatýrasy soltústikte jáne ortalyqta ádettegiden 2...3 gradýsqa tómen bolady. Sondaı-aq, respýblıkanyń ońtústik-shyǵys jáne batys bóliginde aptap ystyq basylady», - delingen habarlamada.
