Qazaqstanda aldaǵy táýlikterde kún salqyndaıdy
ASTANA. QazAqparat - Qazgıdromet 10-12 shilde kúnderi Qazaqstanda kún salqyndaı túsetinin boljap otyr, dep habarlaıdy QazAqparat.
«Demalys kúnderi ońtústik oblystarda aýa temperatýrasy 40...45°S ystyq boldy. Biraq aldaǵy úsh kúnde Reseıdiń Eýropalyq bóliginen jyljyp kele jatqan aýa aǵyndarymen birge Qazaqstanǵa salqyn jáne ylǵaldy aýa kele bastaıdy. Sondyqtan respýblıka aýmaǵynyń basym bóliginde aptap ystyq báseńdep, soltústik jartysynda kún kúrkirep, jańbyr jaýady, kúshti jel turýy múmkin. Ońtústik oblystardyń keıbir aýdandarynda da, ásirese taýly jáne taý bókteri aýdandarynda naızaǵaı jarqyldap, ótkinshi jańbyr jaýýy yqtımal», - deıdi sınoptıkter.
