Qazaqstanda aldaǵy úsh jylda 2,5 myń shaqyrym jańa temirjol salynady
ASTANA. KAZINFORM — Qazaqstanda aldaǵy úsh jylda 2,5 myń shaqyrymǵa jýyq jańa temirjol salý josparlanyp otyr. Sońǵy bes jylda elimizde shamamen 5 myń shaqyrym temirjol salynǵan. Sondaı-aq qoldanystaǵy jelilerdi jańǵyrtý jáne Qytaımen shekaradaǵy júk ótkizý múmkindigin arttyrý jumystary jalǵasyp jatyr.
Bul týraly Astanada ótip jatqan TransLogistica Kazakhstan 2026 halyqaralyq kórmesinde QR kólik vıtse-mınıstri Jánibek Taıjanov aıtty.
Vıtse-mınıstrdiń málimetinshe, halyqaralyq júk tasymalyn ulǵaıtý úshin Qytaımen shekaradaǵy temirjol stantsııalarynyń ótkizý múmkindigi keńeıtilip jatyr. Osy baǵyttaǵy iri jobalardyń biri — Baqty — Aıagóz temirjol jelisiniń qurylysy. Joba iske asqannan keıin Qazaqstan men Qytaı arasynda jańa temirjol ótkeli ashylady.
— Qytaımen shekarada halyqaralyq júkterdi ótkizýge arnalǵan stantsııalardyń múmkindigin keńeıtý boıynsha aýqymdy jumys júrgizip jatyrmyz. Sonymen qatar Baqty — Aıagóz baǵytynda jańa temirjol salynyp jatyr. Bolashaqta osy baǵyt arqyly Qytaımen taǵy bir temirjol ótkeli ashylady, — dedi Jánibek Taıjanov.
Jańa temirjol jelilerin salý jáne qoldanystaǵy ınfraqurylymdy jańǵyrtý Qazaqstannyń tranzıttik áleýetin arttyrýǵa baǵyttalǵan. Qytaımen aradaǵy qosymsha ótkel halyqaralyq júk tasymalyna túsetin júktemeni azaıtyp, tasymal múmkindigin keńeıtýge yqpal etedi.
Aıta keteıik, TransLogistica Kazakhstan 2026 halyqaralyq kórmesi 14–16 qazan aralyǵynda Astanadaǵy EXPO halyqaralyq kórme ortalyǵynda ótip jatyr. Bıyl oǵan 20 elden 230 kompanııa qatysýda.
