Qazaqstanda aldaǵy úsh jylda 1,3 myń shaqyrymnan astam temirjol salynady – Prezıdent

Qazaqstanda aldaǵy úsh jylda 1,3 myń shaqyrymnan astam temirjol salynady. Bul týraly Qazaqstan men Reseıdiń XIX Óńiraralyq yntymaqtastyq forýmynda Memleket basshysy Qasym-Jomart Toqaev aıtty, dep habarlaıdy Kazinform.

«Agroónerkásip jáne eksport áleýetiniń tolyqqandy paıdalanylmaýyna kóp jaǵdaıda kólik-logıstıka salasyndaǵy shekteýler áser etedi. Logıstıka jáne qoıma júıesiniń tapshylyǵyna baılanysty Qazaqstan men Reseıde óndirilgen aýyl sharýashylyǵy ónimderiniń shyǵyny 40 paıyzǵa jýyqtaıdy. Sondyqtan ónim saqtaý ınfraqurylymyn damytý, sonyń ishinde elevatorlardy, kókónis, jemis-jıdek qoımalaryn kóbeıtý ekijaqty yntymaqtastyqtyń mańyzdy baǵytyna aınalýǵa tıis», - dedi Qasym-Jomart Toqaev.

Memleket basshysy Qazaqstan jýyq arada klımattyq baqylaý júıesi bar ónim saqtaý qoımalarynyń syıymdylyǵyn 1 mıllıon tonnaǵa ulǵaıtýdy josparlap otyrǵanyn aıtty.

«Bizde Qytaı, Úndistan, Taıaý Shyǵys elderi sııaqty keleshegi zor ónim ótkizý naryqtary bar. Olardyń azyq-túlikke suranysy ulǵaıa túskenin eskersek, «Soltústik – Ońústik» kólik dáliziniń de róli kúsheıedi. Ortalyq Azııa arqyly logıstıkanyń jańa baǵyttaryn damytý jáne Qytaımen aradaǵy qazirgi kólik baǵdarlarynyń júk ótkizý múmkindigin arttyrý yqpaldastyqtyń basym baǵyttarynyń biri bola alady. Osyǵan baılanysty Kaspıı teńizindegi Quryq jáne Aqtaý porttaryna aýqymdy jańǵyrtý jumystaryn júrgizýdi josparlap otyrmyz. Qytaı baǵytynda «Dostyq – Moıynty» temirjol ýchaskesiniń ekinshi jolyn salý jobasyn júzege asyrýǵa kiristik. Jalpy, Qazaqstanda aldaǵy úsh jylda 1,3 myń shaqyrymnan astam temirjol salynady», – dedi Memleket basshysy.