Elimizde aldaǵy úsh kúnde 45 gradýsqa deıin ystyq bolady
ASTANA. KAZINFORM — Qazaqstannyń basym bóliginde aldaǵy úsh kúnde aptap ystyq saqtalady. Keı óńirlerde aýa temperatýrasy 45 gradýsqa deıin kóterilse, batys, soltústik-batys jáne shyǵys aımaqtarda naızaǵaı oınap, nóser jańbyr jáne burshaq jaýyp, ekpini kúshti jel soǵady.
Qazgıdromet sınoptıkteriniń boljamynsha, 9 shildede mundaı aýa raıy shyǵys óńirlerge aýysady. Bul aımaqtarda da nóser jańbyr men naızaǵaı boljanady, alaıda keıin jaýyn-shashyn toqtap, kún ashylady.
Ońtústik jáne ońtústik-shyǵystyń taýly aýdandarynda qysqa merzimdi jańbyr jaýyp, naızaǵaı bolady. Al respýblıkanyń qalǵan aýmaǵynda jaýyn-shashynsyz, qurǵaq ári ystyq aýa raıy saqtalady.
— Kúndiz aýa temperatýrasy elimizdiń basym bóliginde qatty jáne óte qatty ystyqtyń shegine jetedi. Batys pen ońtústik-shyǵysta synap baǵany +42 gradýsqa deıin kóterilse, soltústik-batys, soltústik jáne ortalyq óńirlerde +40 gradýsqa deıin ysıdy. Ońtústik oblystarda aptap ystyq kúsheıip, aýa temperatýrasy +45 gradýsqa deıin jetedi. Shyǵys óńirlerde de +38 gradýsqa deıin ystyq bolady, — delingen habarlamada.
Eske salaıyq, buǵan deıin Qazgıdromet 8 shildede elimizdiń birqatar óńirinde aýa raıyna baılanysty eskertý jarııalaǵan edi.
