Qazaqstanda alaıaqtyq áreketter sany artyp otyr

QR ІІM tergeý departamenti bastyǵynyń mindetin atqarýshy Qaırat Nurmaǵambetovtyń aıtýynsha, elimizde alaıaqtyq urlyqtan keıin ekinshi orynda tur. Aǵymdaǵy jyly sońǵy 8 aıda 19 278 alaıaqtyq áreketter tirkelgen. Ótken jyly odan az bolǵan.

«Osy ýaqytqa deıin 5 592 qylmystyq is sotqa jiberildi. Statıstıka boıynsha 8 aıdyń ishinde zańdy tulǵalarǵa qatysty 167 alaıaqtyq áreketter tirkeldi. Byltyr ol kórsetkish 61 bolǵan. Sonyń ishinde 31 is sotqa joldansa, 29 is toqtatyldy. Jalpy, odan 4,4 mlrd teńgeniń shyǵyn keldi. 3,3 mlrd teńge qaıtaryldy», - dedi Q.Nurmaǵambetov «Atameken» UKP Sybaılas jemqorlyqqa qarsy kúres jónindegi keńestiń búgingi otyrysynda.

Onyń aıtýynsha, zardap shekkenderdiń kóbi tıisti qujattardy durys teksermeıdi, ıa bolmasa, óz ańqaýlyǵynan aldanyp qalady.

Aıta keteıik, keńestiń búgingi otyrysynda kásipkerler arasyndaǵy kelisimsharttardy oryndaý máselesi qaraldy.

Búginde «Atameken» palatasyna túsetin aryzdardyń ishinde bıznesmender arasyndaǵy daýlarǵa qatysty shaǵymdar az emes. Olar bir-birine aqsha tólemeıdi. Tipti, seriktestik kelisimin rásimdese de, alaıaqtyq jolmen áriptestiń múlkin urlaý faktileri de bar. Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń sózine qaraǵanda, kásipkerlerdiń kelisimshart mindetterin oryndaı almaýyna memlekettik organdar da kináli. Olar aqshany ýaqytynda bermeıdi. Sodan bıznesmender óz áriptesterine aqshany tóleı almaı júredi.

«Máselen, bıznesmen tenderdi utyp alady. Al memlekettik organ oǵan aqshany tólemeı qoıdy. Sodan búkil tizbek kete beredi. Kásipker óz áriptesine aqsha bere almaıdy. Solaı ary qaraı ketedi», - deıdi B.Palymbetov.

Osy oraıda R.Júrsinov mańyzdy bir máseleni eske saldy.

«Bizde memlekettik organdardyń birinshi basshysy aýyssa, birden barlyq kelisimsharttar joıylady. Ákim, mınıstr bolsyn, kelisimsharttardy birden buza salady. Óte qyzyqty úrdis...», - deıdi R.Júrsinov.