Qazaqstanda alaıaqtarǵa SIM-karta satyp otyrǵan 61 adam ustaldy
ASTANA. KAZINFORM – Qazaqstanda ınternet-alaıaqtyq shemalaryna kómektesken 61 adamnyń zańsyz áreketi toqtatyldy. Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı OKQ alańynda málimdedi.
Onyń aıtýynsha, olar SIM-kartalar men messendjer akkaýnttaryn jappaı rásimdep, sheteldegi alaıaqtyq call-ortalyqtarǵa satyp otyrǵan.
– «Anti-fraud» jedel-profılaktıkalyq is-sharasy barysynda 61 «aktıvator» anyqtaldy. Olar SIM-kartalar men túrli akkaýnttardy tirkep, ınternet-alaıaqtyqpen aınalysqan ortalyqtarǵa berip otyrǵan, – dedi Jandos Súıinbaı.
ІІM málimetinshe, bul baılanys nómirleri men akkaýnttar azamattardy aldaý kezinde paıdalanylǵan.
Sondaı-aq operatsııa barysynda zańsyz aınalymnan 6,2 myń SIM-karta, 358 bank kartasy jáne arnaıy tehnıkalyq qurylǵylar tárkilengen.
Aıta keteıik, buǵan deıin Ýkraınada qazaqstandyqtardy aldaǵan 3 call-ortalyqtyń jumysy toqtatylǵany habarlanǵan edi.
