Qazaqstanda alaıaqtar rásimdegen nesıeler sot sheshiminsiz esepten shyǵarylady — agenttik

ASTANA. KAZINFORM — Qarjy naryǵyn retteý jáne damytý agenttiginiń tóraǵasy Mádına Ábilqasymova qazaqstandyqtardyń atyna alaıaqtyq jolmen rásimdelgen nesıeler qaı jaǵdaıda jabylatynyn túsindirdi. 

Agenttik basshysy mundaı jaǵdaılarda sottan tys jáne sot tártibimen qaryzdy esepten shyǵarý rásimderi qarastyrylatynyn atap ótti.

— Eger nesıe klıenttiń ruqsatynsyz berilse jáne ol bıometrııalyq tekserýden ótpese, onda qaryzdy sottan tys tártipte esepten shyǵarýǵa bolady. Bul turǵyda qylmystyq qýdalaý organdaryna ótinim tapsyrý kerek. Olar nesıe alaıaqtyq jolmen berilgen dep taný týraly tıisti qaýly shyǵarady. Osynyń negizinde qaryzdy esepten shyǵarýǵa bolady, — dedi Mádına Ábilqasymova Májilistiń jalpy otyrysynda depýtattardyń suraǵyna jaýap bere otyryp.

Onyń aıtýynsha, sońǵy eki jylda bankter jalpy somasy 1,9 mlrd teńge bolatyn 1500 nesıe boıynsha 1400 qaryz alýshynyń bereshegi esepten shyǵarylǵan. Bul derekter azamattardyń ótinishi boıynsha qaryzdy sottan tys esepten shyǵarýǵa qatysty.

— Máselen, klıentter bıometrııadan ótkenin jıi kóremiz. Degenmen, jalǵan bıometrııa jaǵdaılary da kezdesip jatyr. Mundaı jaǵdaılarda alaıaqtyqty sot arqyly dáleldeý kerek. Osy oraıda sot tártibinde qaryzdy esepten shyǵarý negizderin aıtarlyqtaı keńeıttik. Eger nesıe tolyǵymen klıenttiń kelisiminsiz berilse, ol mindetti túrde sottyń qaraýynsyz esepten shyǵarylýy kerek. Tıisti norma bar, ony iske asyrý tártibi Іshki ister mınıstrligimen birlesip bekitildi, — dedi Mádına Ábilqasymova.

Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasyndaǵy bankter jáne bank qyzmeti týraly» jáne «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý máseleleri boıynsha ózgerister men tolyqtyrýlar engizý týraly» zań jobalary birinshi oqylymda maquldandy.