Qazaqstanda aqyly joldardyń baǵasy ózgeredi

ASTANA. QazAqparat – Elimizde jyl sońyna deıin aqyly joldardyń tarıfi ózgeredi. Sonymen qatar ekinshi deńgeıli avtojoldardyń keıbirin aqyly etý josparlanǵan. Atalǵan derekti avtomobıl joldary komıtetiniń tóraǵasy Tólegen Abdýllın bólisti, dep habarlaıdy QazAqparat tilshisi.

«Qazir respýblıka boıynsha 2,2 myń shaqyrymdy quraıtyn 11 aqyly jol ýchaskesi bar. Aqyly joldardyń tarıfi 2013-2021 jyldar aralyǵynda kezeń-kezeńimen engizildi. 2013 jyly alǵash «Astana-Şýchınsk» tasjoly aqyly boldy. Bıyl jyl sońyna deıin kólik quraldarynyń barlyq túrlerine jańa abonenttik tólem engiziledi», - dedi Tólegen Abdýllın OKQ-de ótken brıfıngte.

- Jeńil avtokólikter - 1 jylǵa 1000 teńge;

- 16 orynǵa deıingi avtobýstar jáne 2,5 tonnaǵa deıingi júk kólikteri – aıyna 2 AEK, jylyna 20 AEK;

- 32 orynǵa deıingi avtobýstar jáne 5,5 tonnaǵa deıingi júk kólikteri – aıyna 4 AEK, jylyna 40 AEK;

- 32 orynnan joǵary avtobýstar jáne 10 tonnaǵa deıingi júk kólikteri – aıyna 6 AEK, jylyna 60 AEK;

- 15 tonnaǵa deıingi júk kólikteri – aıyna 8 AEK, jylyna 80 AEK;

- 15 tonnadan astam júk kólikteri – aıyna 10 AEK, jylyna 100 AEK.

«Aıta ketý kerek, abonentti sizdiń kóligińiz aqyly joldarǵa irgeles eldimekender men kentte esepte turǵan jaǵdaıda ǵana resimdeýge bolady. Abonementti resimdeý tártibi jaqyn arada «QazAvtoJol» ulttyq kompanııasynyń resmı saıtyna shyǵady. 2023 jyly qoldanystaǵy tarıf boıynsha normatıvtik jaǵdaıyna qaraı 2,5 myń ekinshi tehnıkalyq sanattaǵy tasjoldy aqyly etý josparlanyp otyr», - deıdi komıtet basshysy.