Qazaqstanda aqyly joldardan jylda qansha qarjy jınalatyny jarııalandy
Bul týraly Úkimet otyrysynda «Nurly jol» baǵdarlamasynyń iske asý barysyn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.
«2013 jyly uzaqtyǵy 211 shaqyrym bolatyn «Nur-Sultan – Şýchınsk» alǵashqy aqyly avtojoly qoldanysqa engizildi, sol ýchaskede jylyna 1 mlrd teńgeden astam qarajat jınalady, ol osy ýchaskeni kútip ustaý shyǵynynyń ornyn toltyrady. Qazirgi ýaqytta, aqyly joldardyń uzaqtyǵy 682 shaqyrymǵa deıin artty («Nur-Sultan – Şýchınsk» (211 km), «Nur-Sultan – Temirtaý» (134 km), «Almaty – Qapshaǵaı» (42 km), «Almaty – Qorǵas» (295 km) jáne jyl saıynǵy jınalatyn qarajat 4 mlrd teńgeden astam bolady. Bul osy aqyly ýchaskelerdi kútip ustaýda bıýdjetti únemdeýge múmkindik beredi», - dedi mınıstr.
Onyń sózine qaraǵanda, avtojoldy paıdalanýshylarǵa sapaly jol boıyndaǵy servıspen qamtamasyz etý maqsatynda qoldanystaǵy 1 822 nysannyń 1 myńy Ulttyq standartqa sáıkestendirildi. Bıýdjet jáne jeke kapıtal esebinen qosymsha 73 nysan salyndy. Bul jumystar aldaǵy ýaqytta odan ári júrgiziletin bolady.
