Qazaqstanda aqyly joldardan jyl saıyn 30 mlrd. teńge jınalady
ASTANA. QazAqparat - Qazaqstan bıýdjetine aqyly joldardan jyl saıyn 30 mlrd. teńge túsedi. Bul týraly Úkimette ótken baspasóz máslıhatynda QR Investıtsııalar jáne damý vıtse-mınıstri Roman Sklıar málim etti, dep habarlaıdy QazAqparat.
«2020 jylǵa qaraı 6 myń shaqyrym respýblıkalyq joldarda kezeń-kezeńmen aqyly júıe engiziledi, bul óz kezeginde jyl saıyn 30 mlrd. teńgege jýyq qarjy jınaýǵa múmkindik beredi. Onyń ishinde 2017 jyly 700 shaqyrym jol aqyly bolady»,-dedi Sklıar.
Onyń sózinshe, 2017 jyly respýblıkalyq bıýdjet esebinen Astana-Temirtaý jáne Almaty-Qapshaǵaı, sondaı-aq Dúnıejúzilik bank zaımdary esebinen Almaty-Qorǵas ýchaskelerinde aqy qabyldaıtyn júıeler ornatý kózdelip otyr. Júıeni synaqtan ótkizý úshin bıyl ony qarasha aıynda iske qosý josparlanyp otyr.
Mınıstrlik málimetine qaraǵanda, «Nurly jol» memlekettik baǵdarlamasy aıasynda 2017 jyly 4,4 myń shaqyrym jolda jumys júrgiziledi, oǵan 100 myń adam tartylady. Jyl sońyna deıin 600 shaqyrym jol paıdalanýǵa beriledi dep kútilýde.
Bıyl Beıneý-Aqtaý (230 shaqyrym), Almaty-Taldyqorǵan (24 shaqyrym), sonymen qatar Astana-Pavlodar (232 shaqyrym) avtojolynyń jekelegen ýchaskeleri, Oral-Kamenka (50), Aqtóbe-Atyraý (26), Qordaı asýyn aınalyp ótetin jol (40 shaqyrym) tolyq aıaqtalady.
Bıýdjet qarjysy esebinen 1 myń shaqyrymnan asatyn jańa 8 jobany bastaý kózdelip otyr.
