Qazaqstanda aqyly joldar sapasy men jol boıyndaǵy ınfraqurylym damı túspek
NUR-SULTAN. QazAqparat – Elimizdegi aqyly joldardyń sapasy odan ári artyp, jol boıynda ınfraqurylymdar jetile túsedi. Bul týraly «QazAvtoJol» ulttyq kompanııasynyń aqyly joldar dırektsııasy dırektorynyń orynbasary Sáken Ádilbekov málim etti, dep habarlaıdy QazAqparat tilshisi.
«Qazaqstanda aqyly jol alǵash ret 2013 jyly «Astana - Şýchınsk» tasjolynda engizildi. Jyl ótken saıyn olardyń sany arta tústi. Jol aqysyn tóleýdiń birneshe ádis-tásili bar jáne aldyn ala tóleýge de bolady. Jolaýshylarǵa yńǵaıly bolý úshin onlaın tólem de qarastyrylǵan. Jolaýshylardyń bári birdeı emes, keıin tóleımin dep ótip ketetin adamdar da bar. Olarǵa keıin jol aqysyn tóleý týraly habarlama jiberiledi. Jáne dálel retinde kólik júrgizýshiniń beketten tólemeı ótkeni beınebaqylaýǵa jazylady. Eger biz jibergen habarlamaǵa qulaq aspaı, aqyly jol qunyn tólemegen jaǵdaıda ákimshilik aıyppul salynady», - dedi Sáken Ádilbekov «QazAvtoJol» ulttyq kompanııasy uıymdyrǵan baspasóz týry barysynda.
Onyń aıtýynsha, aıyppuldyń quny zańdy tulǵalar úshin 10 aılyq eseptik kórsetkish (1 AEK – 3063 teńge), al jeke tulǵa úshin 5 AEK.
«Aqyly jol tarıfine kelsek, jeńil avtokólikter úshin 1 shaqyrym jol – 1 teńge. Al aýyr júk kólikter úshin baǵa bólek. Jáne aýyr júk kólikteriniń ózi túrine qaraı ishinara bólinedi. ıAǵnı baǵa júk kóliginiń salmaǵyna baılanysty, salmaq kóp bolǵan saıyn, baǵa da joǵary. Degenmen másele baǵada emes. Bastysy jolaýshylardyń qaýipsizdigi. Bizdiń kompanııanyń maqsaty da sol. Elimizde aqyly joldar men onyń boıyndaǵy ınfraqurylymdy damytýǵa qatysty jumys odan ári jalǵasyn tabady. Bizdiń aldymyzda aqyly joldar sapasy men jol boıyndaǵy ınfraqurylymdy jetildirip, damyta túsý mindeti tur», - deıdi ol.
«QazAvtoJol» kompanııasy ókiliniń málimetinshe, búginde elimizde 11 aqyly jol ýchaskesi bar. Barlyǵy 2134 shaqyrymdy quraıdy.
Buǵan deıin atalǵan kompanııadan aqyly joldyń qunyn aldyn ala tólegenderge 50% jeńildiktiń bary aıtyldy.
