Qazaqstanda AQTQ juqtyrǵan adam sany 13 myń 463 - Densaýlyq saqtaý vıtse-mınıstri
ASTANA. Jeltoqsannyń 1-i. QazAqparat /Qanat Mámetqazyuly/ - Qazaqstanda 13 myń 463 adam AQTQ (VICh) juqtyrǵan. Bul týraly búgin Densaýlyq saqtaý mınıstrliginde «Qazaqstandaǵy AQTQ/JQTB boıynsha jaǵdaı jáne onyń aldyn alý» atty taqyrypta ótken baspasóz máslıhatynda Densaýlyq saqtaý vıtse-mınıstri Tamara Voşenkova málim etti,
dep habarlaıdy QazAqparat.
Vıtse-mınıstrdiń aıtýynsha, Qazaqstanda búgingi kúni AQTQ dertin juqtyrǵandar sany 13 myń 463 adamdy qurasa, onyń ishinde JQTB-men (SPID) aýyratyndar sany 962 adamǵa jetken. Sonymen birge, JQTB-dan qaıtys bolǵandar sany 741 adamdy qurap otyr.
«AQTQ juqpasy respýblıkanyń barlyq aımaqtarynda tirkelgen. Bul rette naýqastar sany Almaty qalasynda, Pavlodar men Qaraǵandy oblystarynda eń kóp tirkelip otyr. Burynǵysynsha, dertti juqtyrǵandardyń úles salmaǵynyń basym bóligin, ıaǵnı 68,3 paıyzyn ınektsııalyq esirtkini paıdalanýshylar quraıdy. Degenmen de, sońǵy 8 jylda AQTQ juqtyrǵandar arasynda ınektsııalyq esirtkini paıdalanýshylar sany birshama azaıyp, 2001-2009 jyldar aralyǵyndaǵy kórsetkish boıynsha jynystyq jolmen aýrý juqtyratyndar sany artyp keledi. Bul ásirese áıel adamdar ortasynda keńinen taralýda», dedi Tamara Voşenkova.
