Qazaqstanda aktıvterdiń shyǵý tegin tekserý tártibi jańardy
ASTANA. KAZINFORM – Qazaqstanda aktıvterdi satyp alý kózderiniń zańdylyǵyn tekserýdi taǵaıyndaý jáne júrgizý qaǵıdalaryna ózgerister engizildi.
Tıisti túzetýler 2026 jylǵy 14 sáýirdegi Bas prokýrordyń buıryǵymen bekitilgen.
Jańartylǵan normalarǵa sáıkes, endi tekserýdi ýákiletti organnyń aktıvterdi qaıtarý jónindegi qurylymdyq bólimshesiniń basshysy nemese onyń orynbasary, sondaı-aq olardyń mindetin atqarýshy tulǵalar bastamalaı alady. Tekserý júrgizýdiń negizi — ýákiletti organ basshysynyń laýazymdy tulǵanyń baıanaty negizinde qabyldaıtyn sheshimi.
Qujatta tekserýlerge aktıvterdi qaıtarý bólimsheleriniń qyzmetkerleri tartylatyny kórsetilgen. Qajet bolǵan jaǵdaıda prokýratýra organdarynyń qyzmetkerleri de qatysa alady. Bas prokýrordyń nemese onyń orynbasarynyń kelisimimen basqa da qurylymdyq bólimshelerdiń, sonyń ishinde óńirlik, áskerı jáne kólik prokýratýrasy qyzmetkerlerin tartýǵa múmkindik bar.
Sonymen qatar, qujatta tekserý júrgizetin top quramyn, tekserý nysanyn jáne merzimin ózgertý múmkindigi qarastyrylǵan. Bul sheshimdi ýákiletti laýazymdy tulǵa qabyldaıdy.
Tekserýshilerdiń ómiri men densaýlyǵyna qaýip tóngen nemese olardyń qyzmetine kedergi keltirilgen jaǵdaıda qaýipsizdikti qamtamasyz etý úshin quqyq qorǵaý organdarynyń qyzmetkerleri tartylýy múmkin.
Sondaı-aq jedel-izdestirý is-sharalaryn júrgizý jáne saraptamalar taǵaıyndaý tártibi naqtylanǵan. Atap aıtqanda, jedel-izdestirý sharalaryn júrgizý týraly qaýlylarǵa Bas prokýror nemese onyń orynbasary qol qoıady, al saraptama taǵaıyndaý týraly sheshimdi aktıvterdi qaıtarý jónindegi ýákiletti organ basshysy qabyldaıdy.
Buıryq 2026 jylǵy 27 sáýirden bastap kúshine enedi jáne 2025 jylǵy 17 jeltoqsannan bastap týyndaǵan quqyqtyq qatynastarǵa qoldanylady.
Buǵan deıin byltyr memleketke qansha zańsyz aktıv qaıtaryldy jáne qarajat qaıda jumsalǵanyn jazdyq.
