Qazaqstanda AQTB ahýaly turaqtalyp keledi
ASTANA. 19 maýsym. QazAqparat - Qazaqstanda AQTB (adamnyń qorǵanysh tapshylyǵynyń belgisi) ahýaly turaqtalyp keledi.
Bul týraly búgin Astanada Ortalyq Azııa elderinde ınektsııalyq esirtki paıdalanýshylar arasynda AQTB-ınfektsııasynyń taralýynyń aldyn alýǵa arnalǵan jıyn barysynda QR Densaýlyq saqtaý mınıstrliginiń jaýapty hatshysy Serikbol Mýsınov málim etti.
«Epıdemııaǵa qarsy júıeli sharalardyń nátıjesinde AQTB, ıakı VICh-ınfektsııasy aınalasyndaǵy ahýal turaqtalyp otyr. 2008 jylmen salystyrǵanda 2011 jyly dertti juqtyrǵandardyń sany 14 paıyzǵa azaıdy», - deıdi ol.
2011 jyly JQTB (juqtyrylǵan qorǵanysh tapshylyǵynyń belgisi nemese SPID) dertine shaldyqqan naýqastardyń sany azaıdy desek te, aǵymdaǵy jyldyń 1 mamyryndaǵy derek boıynsha elimizde 18 459 AQTB-ınfektsııasy bar naýqas tirkelgen. Atalmysh dert Qazaqstanda tirkelgeli beri 3 myń 600 adam indet saldarynan kóz jumdy. Bul jóninde respýblıkalyq JQTB-nyń aldyn alý hám emdeý ortalyǵy málimdep otyr.
«Búkilálemdik ekonomıkalyq forýmnyń 2011 jylǵy reıtingisinde Qazaqstan 142 eldiń ishinde JQTB taralý deńgeıi boıynsha 21 orynda tur. Osy oraıda Qazaqstan Úkimeti ǵasyr indetine qarsy is-sharalardy halyqaralyq jáne otandyq úkimettik emes uıymdarmen birlese atqarýdy basty basymdyq dep qarastyrady», - dep atap kórsetti S. Mýsınov.
Jalpy, JQTB derti elimizde 23 jyl buryn tirkelgen. Respýblıka boıynsha Almaty qalasynda dertke shaldyqqan naýqastar sany basym. 23 jyl ishinde ońtústik astanamyzda 557 adam AQTB-ınfektsııasynan kóz jumsa, JQTB 88 adamnyń ómirin qıdy.
Keńes jumysyna Qyrǵyzstan, Tájikstan, Túrkimenstan, Ózbekstan, Ýkraına, Avstralııa elderiniń densaýlyq saqtaý, ishki ister jáne ádilet salalarynyń ulttyq sarapshylary, sondaı-aq azamattyq qoǵam ókilderi qatysty.
Uıymdastyrýshy - Dúnıejúzilik densaýlyq uıymynyń Eýropalyq óńirlik bıýrosy, qabyldaýshy tarap - QR Densaýlyq saqtaý mınıstrligi.
3 kúnge sozylatyn keńes kezinde sarapshylar ınektsııalyq esirtki paıdalanýshylar AQTB dertine shaldyqqan jaǵdaıda aldyn alý, emdeý jáne kómek kórsetýdi keńinen qamtyp, qoljetimdiligi men sapasyn arttyrý joldaryn anyqtaıdy. Bul óz kezeginde ınektsııalyq esirtki paıdalaný nátıjesinde dertti jańadan juqtyratyndar sanyn azaıtýǵa jáne indetke baqylaý jasaýǵa múmkindik beredi.
