Qazaqstanda aqtaý úkimderiniń sany artty

ASTANA. QazAqparat - Qazaqstanda aqtaý úkimderiniń sany 11,7 paıyzǵa artty. Bul týraly búgin 2017 jyldyń 1 jartyjyldyǵynda sot tóreligin júzege asyrý qorytyndylaryna arnalǵan respýblıka sýdıalarynyń keńeıtilgen otyrysynda QR Joǵarǵy sotynyń tóraǵasy Qaırat Mámı aıtty, dep habarlaıdy QazAqparat.

«Biz sońǵy  2 jylda sot júıesin keshendi jańǵyrtý boıynsha  túbegeıli sharalardy iske asyryp úlgerdik. Osy ýaqytta úsh satyly sot júıesi, sondaı-aq sýdıalardy irikteý men mansaptyq ilgeriletýdiń jańa erejeleri kúrdeli synaqtan ótti. 2016 jyldyń qorytyndysyna oraı  osy jyldyń basynda, osy zalda sot ádildiginiń sapasyn  talqylaǵan kezde sot ádildigi  neǵurlym jaqsarǵanyn aıtqan bolatynbyz. Atalǵan úrdis aǵymdaǵy jyly da óz jalǵasyn taýyp otyr», - dedi Qaırat Mámı.

Osy oraıda Joǵarǵy sot tóraǵasy alqaly jıynǵa qatysýshylardyń nazaryn keıbir statıstıkalyq derekterge aýdardy.

«Azamattyq isterdi qaraý merzimi 2 esege qysqardy. Olardyń 83,5 paıyzy alǵashqy sot otyrysynda aıaqtalyp, túpkilikti sheshimin tapty. Sot buıryǵy  negizinde qaralǵan ister 4 esege, balamaly tásilder boıynsha aıaqtalǵan ister 3 esege, medıatsııa tártibinde qaralǵan isterdiń sany 1,6 esege artty. Azamattyq isterdiń 62,5 paıyzy jeńildetilgen is júrgizý tártibinde qaralýda. Qylmystyq ister boıynsha da dál osyndaı ahýal qalyptasyp otyr. Respýblıka boıynsha  kelisimdik negizdegi ister  sany 2 esege jýyq, qysqartylǵan tártippen qaralǵan  qylmystyq ister sany 3,5 esege,  medıtsııany qoldaný arqyly aıaqtalǵan isterdiń sany 1,5 esege  artty. Aqtaý úkimderiniń sany 11,7 paıyzǵa kóbeıip, alqa bıleriniń  qatysýymen qaralǵan isterdiń sany 32-ge artty.  Qoryta kelgende isterdiń barlyq sanattary boıynsha sot ádildigin júzege asyrý sapasy joǵary deńgeıde qalyp otyr», - dedi ol.