Qazaqstanda aqtaý úkimderi Germanııa kórsetkishimen teńesti

ASTANA. QazAqparat - Qazaqstanda aqtaý úkimderiniń paıyzy Germanııa kórsetkishimen teńesti. Bul týraly búgin  respýblıkalyq sýdıalardyń keńeıtilgen keńesinde  QR Joǵarǵy sotynyń tóraǵasy Jaqyp Asanov aıtty, dep habarlaıdy QazAqparat tilshisi.

«Prokýrordyń atynan memleket aıyptaýlaryndaǵy aqtaýlarlar jaıynda aıtaıyq. Mine, dál osy prokýror aıyptaýshy bolatyn isterge aqtaý úkimderiniń kúrt ósimi 4 esege jetip otyr. 2017 jyly 28, al aǵymdaǵy jyly 101 adam  aqtaldy. Degenmen, bul jáı ánsheıin tsıfrlar ǵana. Munan da tereń boılaý qajet. Ótken jyly negizinen aqtaýlar jat qylyqtar men asa aýyr emes qylmystar esebinen boldy. Al aǵymdaǵy jyly negizinen aýyr jáne asa aýyr qylmystar esebinen oryn aldy»,-  dedi Joǵarǵy sot tóraǵasy.

Elimizdiń bas sýdıasynyń dereginshe, osy jyldyń 1 jartyjyldyǵynda 14 myń úkim shyǵarylǵan. Biraq, onyń jartysynda eshqandaı máseleler týyndamaıdy. Sebebi sottalýshy belgilengen kinásin moıyndap, jazamen kelisedi.

«Sonda qalǵany 7328 úkim bolsa, onyń 101-i  aqtaý úkimi, ıaǵnı, 1,4 paıyzdy quraıdy. Bul 1,2 paıyzyna aqtaý úkimin shyǵaratyn Germanııa sottary jumysynyń kórsetkishterimen saı keledi», - dedi ol.