Qazaqstanda aqsha-nesıe saıasatynyń jańa quraly engiziledi
«Aqsha-kredıt saıasatynyń transmıssııalyq tetiginiń tıimdiligin arttyrý, sondaı-aq týyndy qarjy quraldarynyń naryǵyn damytý maqsatynda Ulttyq Bank «Qazaqstan qor bırjasy» aktsıonerlik qoǵamynyń alańynda ótimdilikti usyný, sol sııaqty alý boıynsha bir kún merzimine valıýtalyq svop operatsııalaryn júzege asyrýdy bastaý týraly sheshim qabyldady»,-delingen baspasóz habarlamasynda.
Valıýtalyq svop arqyly ulttyq valıýtada ótimdilikti usyný Ulttyq Banktiń bazalyq mólsherlemesi boıynsha plıýs jyldyq 2%-pen (eki protsentpen) júzege asyrylady. Operatsııalardy júrgizý arqyly ulttyq valıýtada ótimdilikti alý aqsha jáne valıýta naryqtary arasyndaǵy ózara baılanysty qamtamasyz etetin AQSh pen Qazaqstan mólsherlemeleriniń dıfferentsıalyn eskere otyryp eseptelgen formýlaǵa sáıkes paıyzdyq mólsherleme boıynsha júzege asyrylatyn bolady:
(R_KZT - R_USD)/(1 + R_USD)
munda,
R_KZT - Ulttyq Banktiń bazalyq mólsherlemesi mınýs jyldyq 1% (bir protsent);
R_USD - Bloomberg nemese Thomson Reuters aqparattyq resýrstarynyń derekteri boıynsha aldyńǵy jumys kúni úshin AQSh dollary boıynsha birkúndik LIBOR mólsherlemesi.
Turaqty qoljetimdilik operatsııalary boıynsha mólsherlemeler dálizine qatysty svop operatsııalary boıynsha mólsherlemelerdiń barynsha keń dálizi teńgelik ótimdilikti tartý kezinde kepildi qamtamasyz etý retinde shetel valıýtasyn paıdalanýdy yntalandyrmaýǵa baǵyttalǵan.
Valıýtalyq svop operatsııalary arqyly ótimdilikti alý boıynsha Ulttyq Bank operatsııalarynyń kún saıynǵy kólemi 500 000 000 (bes júz mıllıon) AQSh dollary mólsherinde lımıtteledi.
Foto: 1zoom.net