Qazaqstanda AQSh-tyń ınvestorlary salyqty daýlap júr
ASTANA. QazAqparat - Joǵarǵy sottyń mamandandyrylǵan sot alqasynyń tóraǵasy Aıgúl Qydyrbaevanyń aıtýynsha, ótken jyly ınvestıtsııalyq daýlar boıynsha 95 aryz-shaǵym túsken, dep xabarlaıdy QazAqparat tilshisi.
Onyń sózine qaraǵanda, osy ýaqytqa deıin 31 aryz qaralyp, 10 istiń sheshimi ınvestorlardyń paıdasyna shyǵaryldy. Olardyń qatarynda 2 iri ınvestor da bar.
"Bizdegi ınvestıtsııalyq daýlardyń basym bóligin ınvestorlar men memlekettik organdar arasyndaǵy daýlar quraıdy Osy isterdiń deni - salyqtyq daýlar. Investorlar kóp jaǵdaıda memlekettik kirister organdarynyń eskertý qaǵazdaryn daýlap jatady. Al ınvestorlardyń qaı memleketten kelgenine toqtalsaq, ol - AQSh, Nıderlandy, Qytaı men Kanadanyń ınvestorlary. Olar munaı-gaz salasyndaǵy barlaý men óndirý salasyndaǵy salyqty jıi daýlaıdy", - deıdi Qydyrbaeva.
Aıta keteıik, búgin QR Joǵarǵy sot ótken jyldyń jumysyn qorytyndylap, Qazaqstan sottarynda qaralǵan qylmystyq isterdiń sany da jarııalady. Ondaı isterdiń sany artyp otyr. Degenmen, búginde eki jaqtyń ymyraǵa kelip, qylmys jasaǵandardy jıi bosata bastady. Byltyr sotttarǵa túsken 16 529 qylmystyq is toqtatylyp, 18 854 adam jazadan qutyldy. "Olardyń barlyǵy zardap shekken jaqpen ymyraǵa kelip, shyǵyndy tolyǵymen ótedi. Sóıtip, aqtaý úkimderiniń sany 19,2 paıyzǵa artyp otyr. Osynyń ózi sot tóreligin júzege asyrý barysynda adamdy qamaýǵa alý sharalarynyń azaıyp kele jatqanyn kórsetse kerek", - deıdi Raxmetýllın. Jemqorlar aıyppuldyń basym bóligin bıýdjetke tólep úlgerdi . Al qaraıym xalyq tergeýshi sýdıalardyń qyzmetine jıi júgine bastady.
