Qazaqstanda AQSh tájirıbesine uqsas IPR Center qurylady
«Investıtsııa tartý Úkimettiń aldyndaǵy basty mindetterdiń biri. Qazaqstanda óz jobalaryn iske asyrýǵa úmittengen ınvestorlar menshik quqyqtary, onyń ishindegi zııatkerlik menshikke quqyǵy qorǵalatynyna senimdi bolýy kerek. 2018 jyldyń 20 maýsymynda zııatkerlik menshik salasynda zań qabyldandy. Zańnyń negizgi jańashyldyǵy: zııatkerlik menshik nysandaryn bir satylyq tirkeý júıesin qurý, taýar tańbalaryna quqyqtar buzylǵan jaǵdaıda zııan úshin ótemaqy tóleıtin ınstıtýt engizý, avtorlyq quqyqty elektrondy tirkeý, tirkeý merzimin 20 jumys kúninen 1 kúnge deıin qysqartý bolyp otyr», - dedi Ádilet mınıstri Marat Beketaev elordada halyqpen esep berý kezdesýinde.
Marat Beketaevtyń aıtýyna qaraǵanda, atalǵan sharalar qolaıly ınvestıtsııalyq klımatty qalyptastyryp, ónertapqyshtardyń ınnovatsııalyq belsendiligin arttyrýda.
«Osylaısha, Ulttyq zııatkerlik menshik ınstıtýty óz qarajaty esebinen EKSPO aýmaǵynan jańa ǵımarat aldy. Astana-Habta front-keńse ashyldy. Amerıka Qurama Shtattarynyń tájirıbesi boıynsha IPR Center qurý josparlanýda. AQSh-tyń ol Biryńǵaı úılestirý ortalyǵyna 19 federaldy vedomstvo men 4 halyqaralyq uıym kiredi. Bul jedel aqparat almasýǵa, quqyqbuzýshylyqqa ýaqtyly shek qoıýǵa, ýákiletti vedomstvo qyzmetkerleriniń biliktiligin arttyrýǵa yqpal etedi», - dedi Marat Beketaev.
