Qazaqstanda AQSh ınvestorlarynyń qarjysyna qalaı qol jetkizýge bolady?
ALMATY. QazAqparat - Qazaqstandyq startaperler álemdik «Shark Tank» realıtı-shoýyna qatysa alady. Ol úshin otandyq kásipkerlerge ne isteý kerektigin búgin Almatyda ótken «GoViral» batyl ıdeıalar festıvalinde álemdik AVS arnasynyń «Shark Tank» realıtı-shoýynyń jetekshisi Brendon Endrıýs aıtty, dep habarlaıdy QazAqparat.
Amerıkalyq baǵdarlama alǵash ret 2009 jyly jaryqqa shyqqan edi.
Bul japondyq «Dragons Den» shoýynyń álemdik franshızasy bolyp tabylady.
Baǵdarlamaǵa qatysýshyǵa 90 sekýnd ishinde bıznestiń «azýly arystandary» aldynda óziniń bıznes-jobasyn tanystyryp shyǵýǵa mursat beriledi.
Álemdik ınvestorlar keıin ózderine unaǵan jobaǵa qarjy salady.
Qazir efırde 9-maýsym ótip jatyr.
«Jobaǵa qatysý úshin bıznestiń belgili bir bóligi Amerıkada bolýy kerek. Eger bul másele sheshilse, biz óz kezegimizde barynsha múmkindikti qarastyramyz. Men Sizderge elektrondy forma jiberem. Sony toltyryp jiberesizder. Amerıkandyq tarap ary qaraı ótinimderdi irikteıdi. Al eger sizder tek Qazaqstan nemese TMD aımaǵynda ǵana bıznes júrgizem deseńizder «Shark Tank Australia» shoýyna qatysa alasyzdar. Aýstralııalyq nusqada bıznestiń geografııasyna shekteý joq. Onda da bıznes ıdeıańdy qorǵap, jaqsy ınvestıtsııa alýǵa bolady»,- dedi Brendon Endrıýs.
«Shark Tank» jobasynyń kastıng dırektory osy ýaqytqa deıin mıllıondaǵan jobamen tanysqan.
«Eń bastysy adamnyń bızneske degen yntasy joǵalmasa boldy. Investorlar, bankırler, klıentter aldynda ózińizdi sarapshy sııaqty ustańyz. 90 sekýnd ishinde siz óz jobańyzdy 7 jastaǵy balaǵa túsindirgen sııaqty qarapaıym tilmen aıtyp shyǵyńyz. Kóp kásipkerler ınvestorlar aldynda aqsha týraly aıtýdan qysylady. Kerisinshe kásipker naryq talaptaryn biletinin kórsetýi tıis. Kásipker retinde sizdiń órleý men quldyraýǵa daıyn ekendigińizdi ınvestorlar baıqaýy tıis», - dedi ol.
Sondaı-aq, sarapshy AQSh-ta patent alý qanshalyqty qıyn ekendigin aıtyp berdi.
«AQSh zańnamasy avtorlyq quqyqqa kelgende óte qatal. Patent alýǵa 1 jyldaı ýaqyt ketedi. Eń aldymen patent uıymdary kásipkerdiń patentin osynyń aldynda alynǵan patenttermen salystyrady. Eger, eshqaısysyna uqsamasa shartty patent beredi. Bıznes júrgizýge shartty patent jaraı beredi. Osy ýaqyt aralyǵynda qosymsha tekserýler júredi. Nátıjesinde úkimettik organdar patentti bekitedi. Buǵan shamamen 2-5 myń AQSh dollary ketedi», - dedi «GoViral» festıvaliniń qonaǵy.
