Qazaqstanda AQSh dollaryn satyp alý qarqyny báseńdedi
«2022 jylǵy maýsymda teńgeniń bırjalyq baǵamy 1 AQSh dollary úshin 425,41 – 470,24 teńge aralyǵynda ózgerdi. Maýsym aıynyń sońynda teńgeniń AQSh dollaryna qatysty bırjalyq baǵamy bir aıda 13,3 paıyzǵa álsirep, 1 dollar úshin 470,24 teńge boldy. Teńge-dollar boıynsha operatsııalardyń jalpy kólemi bir aıda 12,1 mlrd AQSh dollaryn qurady. Onyń ishinde Qazaqstan qor bırjasyndaǵy bırjalyq saýda-sattyq kólemi – 2,1 mlrd AQSh dollary, bırjadan tys valıýta naryǵyndaǵy operatsııalar kólemi – 10 mlrd AQSh dollary boldy», - delingen Ulttyq bank málimetinde.
Atap aıtqanda, bırjadan tys naryqtaǵy operatsııalardyń jalpy kóleminde bir enshiles banktiń úlesi 81,8% nemese 8,2 mlrd AQSh dollaryn qurady. Bul olardyń menshikti kapıtaldy valıýta táýekelderinen hedjırleýine baılanysty boldy. Operatsııalar bank tobynyń ishinde júrgiziledi jáne ishki valıýta naryǵyndaǵy shetel valıýtasynyń suranysy nemese usynysy araqatynasyna áser etpeıdi.
«2022 jylǵy maýsymda halyq netto-negizde 91,5 mlrd teńgege balamaly somaǵa qolma-qol shetel valıýtasyn satyp aldy. Aldyńǵy aımen salystyrǵanda bul shyǵystar 2,7 ese tómendedi (2022 jylǵy mamyrda – 249,7 mlrd teńge). 2021 jyldyń osy kezeńimen salystyrǵanda, (237 mlrd teńge) netto-satyp alý kólemi 2,6 ese tómendedi», - dep atalyp ótken bank aqparatynda.
Osy oraıda shyǵystardyń negizgi kólemi, ıaǵnı 46,4% nemese 42,4 mlrd teńge AQSh dollaryn, 16,4% nemese 15 mlrd teńge Reseı rýblin, 36,7% nemese 33,6 mlrd teńge eýrony satyp alýǵa baǵyttaldy.
«Valıýta túrleri boıynsha bólgende bir aıda AQSh dollaryn satyp alýǵa arnalǵan shyǵystar 4,9 ese tómendedi. Al Reseı rýblin satyp alýǵa arnalǵan shyǵystar 5,7%-ǵa ósti jáne eýrony satyp alýǵa arnalǵan shyǵystar 31%-ǵa artty», - delingen UB habarlamasynda.
