Qazaqstanda aqparattyq texnologııalardy damytýdyń basty problemasy nede
ASTANA. QazAqparat - Halyqaralyq aqparatttyq texnologııalar ýnıversıtetiniń rektory Damır Shynybekovtyń oıynsha, elimizde aqparattyq texnologııalardy keńinen qoldanyp, ony xalyqqa jan-jaqty kórsetetin kreatıvti qoǵam qajet. Alaıda sol kreatıvti qoǵamdy qalyptastyratyn mamandar tapshy, dep habarlaıdy QazAqparat tilshisi.
«Árıne, aldymen xalyqtyń basym bóligin jyldam ǵalamtor jelisimen qamtamasyz etý kerek. Óıtkeni qazaqstandyqtardyń 80 paıyzy ondaı jelimen qamtylmasa, sandyq texnologııalardy damytý qıynǵa soǵady. Ol - bir. Ekinshiden, osy saladaǵy mamandardyń ortasyn qalyptastyrý qajet. Bylaısha aıtqanda, bizge kreavtıvti qoǵam kerek. Olar aqparattyq texnologııalardy qoldanýdy xalyqqa jan-jaqty kórsetip, kreatıvti ómir súrý saltyn qalyptastyra alady. Osy oraıda joǵary jáne joǵary bilimnen keıingi oqýǵa negizgi basymdyq bergen jón. Bizde ýaqyt óte az. Osyny tezdetip qolǵa alý qajet», - deıdi Shynybekov.
Onyń aıtýynsha, Qazaqstan aqparattyq texnologııalar naryǵyn ózi qalyptastyra almasa, sol naryqqa qajetti mamandardy da daıarlaı almaıdy. Osyǵan baılanysty Memleket basshysy óz Joldaýynda start-ap jobalardy qurý máselesin kóterip otyr. Sebebi start-ap jobalar - bul bolashaq kompanııalar. Olar ekonomıkanyń draıverine aınalýy ábden múmkin.
«Bul jerde taǵy bir problema bar. Búginde Qazaqstannyń joǵary oqý oryndarynda 480 myńǵa jýyq stýdent oqıdy. Biraq olardyń ishinde tek 50 myń jas qana aqparattyq texnologııalar boıynsha bilim alady. Al jyl saıyn 15-aq myń adam oqýdy aıaqtaıdy. Olardyń sany bir nárseni ózgertýge jetedi dep oılaısyz ba? Bul jerde bir nárseni eskergen jón, oqýdy bitirgen túlekterdiń ishinde tek árbir altynshy, ıa bolmasa, jetinshi maman ǵana ekonomıkaǵa paıdaly start-ap jobalardy usyna alady», - dep atap kórsetti Shynybekov.
Ýnıversıtet rektory osy saladaǵy memlekettik granttardyń sanyn kóbeıtý kerek dep sanaıdy. Sondaı-aq aqparattyq texnologııalarǵa arnalǵan mamandyqtar tizimin qaıta qarap shyǵý qajet.
Aıta keteıik, bıylǵy Joldaýda Prezıdent tsıfrlyq texnologııany qoldaný arqyly qurylatyn jańa ındýstrııalardy órkendetýdi tapsyryp otyr. Osyǵan oraı, Úkimetke «Tsıfrly Qazaqstan» atty jeke baǵdarlamany ázirleý mindeti júkteldi.
«Tsıfrlyq ındýstrııany damytý basqa barlyq salalarǵa serpin beredi. Sondyqtan Úkimet aqparattyq texnologııalar salasyn damytý máselesin erekshe baqylaýda ustaýǵa tıis», - deıdi N.Nazarbaev.
