Qazaqstanda aqparattyq servısterde kemshilik tapqandarǵa syıaqy beriledi

NUR-SULTAN. QazAqparat – Memlekettik organdardyń aqparattyq júıelerindegi kemshilikti tapqan qazaqstandyqtarǵa syıaqy beriledi. Bul týraly Ortalyq kommýnıkatsııalar qyzmetindegi baspasóz máslıhatynda aıtyldy, dep habarlaıdy QazAqparat tilshisi.

«BugBounty aqparattandyrý nysandarynda aqparattyq qaýipsizdik boıynsha qoǵamdyq baqylaý tetigi engizilip otyr. Qazaqstanda aqparattyq qaýipsizdik salasynda táýelsiz zertteýshiler jasaı alatyn áleýetti damytý júrip jatyr. Qazirgi kezde 275 zertteýge qatysýshy tirkeldi. 2020 jyldyń jeltoqsanynan qazirgi ýaqytqa deıin júıe osaldyǵy men kemshiligi týraly málimetpen 172 esep kelip tústi. 1 mln teńge somasyna 11 esep boıynsha tólem jasaldy», - dedi QR Tsıfrlyq damý, ınnovatsııalar jáne aeroǵarysh ónerkásibi mınıstrligi Aqparattyq qaýipsizdik komıtetiniń tóraǵasy Rýslan Ábdiqalyqov.

Óz kezeginde «WebTotem» JShS dırektory Oljas Satıev BugBounty baǵdarlamalary Mail.ru, Yandex. GOOGLE, UBER sekildi kóptegen uıymdarda iske qosylǵanyn atap ótti.

«Eger qandaı da bir zertteýshi, ádepti haker jeliniń osal tustaryn anyqtasa, osy kemshilikter jaıynda habarlap, aqshalaı syıaqy alady. Qazaqstanda biz biregeı baǵdarlamany iske qostyq, azamattardyń barsha memlekettik júıelerdegi kemshilikterdi habarlaýǵa múmkindigi bar», - dedi O. Satıev.

Onyń aıtýynsha, banktermen jumys isteý úshin osy tektes júıe Ulttyq bankpen birlese pysyqtalyp jatyr.

«Qazirgi ýaqytta Qazaqstan boıynsha kóptegen ádepti hakerler mańyzdy ınfraqurylymda, bankterdegi kemshilikterdi kórsetti», - dedi «WebTotem» JShS dırektory.

Budan buryn habarlanǵandaı, byltyr kúzde QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın memorgandardyń aqparattyq júıesinen kemshilik tapqandarǵa syıaqy berýdi usynǵan bolatyn.