Qazaqstanda aqparattyq portaldardyń kórsetkishterin ólsheıtin saıt jumys isteı bastady

Otandyq naryq úshin jańa resýrs - olshem.kz saıty derekter analıtıkasy salasyndaǵy Chartbeat atty ozyq kompanııamen birlese otyryp júzege asyryldy. Kompanııanyń qyzmetterin AQSh medıa naryǵynyń 75% qoldanady. Ashyq, aıqyn ári kásibı medıa naryǵyn qalyptastyrý maqsatynda jetekshi qazaqstandyq ınternet-basylymdardyń birlesken sheshimi retinde qurylǵan bul veb-saıt óz jumysynda eń úzdik halyqaralyq standarttardy qoldanatyn bolady.

Chartbeat tehnologııalary otandyq BAQ-qa óz oqyrmandarynyń shynaıy qajettilikterin eskere otyryp, bıznes úderisterdi ornatýdyń arqasynda jarnama berýshilerdi keńinen tartýǵa múmkindik bermek. Zamanaýı quraldar men ozyq tehnologııalardy qoldaný jýrnalıstıka sapasyn kóterip, otandyq BAQ naryǵynyń kásibı deńgeıiniń ósýine ákelmek.

«Qazaqstan tarıhynda tuńǵysh ret 25 otandyq ınternet BAQ oqyrmandarmen jáne jarnama berýshilermen óz qarym-qatynasynda adaldyqty ustanatyndyǵyn ashyq túrde kórsetetin bolady. Chartbeat tehnologııalarynyń arqasynda olar statıstıkalyq kórsetkishterin, sonyń ishinde buǵan deıin beımálim bolyp kelgen kórsetkishterdi de jarııa etpek. Bul oqyrmandardyń qajettilikterin tereńirek túsinip, aýdıtorııany tartý, qazaqstandyqtar úshin shynymen de mańyzdy ári qajetti reportajdar men longrıdterdi daıyndaýǵa baǵyttalǵan kóbirek kontentti jasap shyǵarý úshin qazaqstandyq jýrnalısterge arnalǵan biregeı múmkindik», - dep óz boıymen bólisti Chartbeat jobasy Qamqorshylar keńesiniń tóraǵasy Mıhaıl Dorofeev.

Saıt Qazaqstandaǵy Chartbeat aptalyǵy aıasynda iske qosyldy. 4 naýryzdan bastap bilim berý baǵdarlamalary jónindegi aǵa basshy Djıll Nıkolson jáne klıenttermen jumys júrgizý jónindegi menedjer Kara MakKloýskı Almaty jáne Astana qalalarynda bilim berý trenıngteriniń toptamasyn ótkizip, joba qatysshylarynyń redaktsııalarynda bolyp qaıtady. Sondaı-aq, sapar aıasynda jarnama naryǵynyń qatysýshylary úshin Chartbeat servısiniń quraldaryna arnalǵan semınarlar jáne QR Aqparat jáne qoǵamdyq damý mınıstrligimen kezdesý ótkiziledi.

«Qazaqstandaǵy AQSh elshiligi Qazaqstan halqy men Úkimeti úshin mańyzdy birqatar bastamalarǵa qoldaý kórsetýdi jalǵastyryp keledi. Osyndaı bastamalardyń biri - el ishinde myqty ári kásibı jýrnalıstıkany ilgeriletý. Qazaqstan Úkimeti jáne qazaqstandyq qoǵam AQSh-ta qoldanylatyn ınnovatsııalar men tehnologııalarǵa qyzyǵýshylyq tanytyp otyr. AQSh bas konsýly retinde men bul joba osy tehnologııalardyń keıbireýin engizip, osylaısha Qazaqstandaǵy myqty jýrnalıstıkany qoldaýǵa óz úlesin qosady degen úmittemin», - dep atap ótti AQSh bas konsýly Erık Meıer.

Olshem.kz resýrsy jarnama naryǵy men jobaǵa qatysatyn portaldardyń oqyrmandar aýdıtorııasy jaıly shynaıy aqparat alýǵa múmkindik bermek. Chartbeat servısterin qoldanatyn medıa resýrstar jarnama naryǵymen ári naqty analıtıkamen bólisetin bolady. Olar kontent sapasyn jaqsartady. Servıs qatysýshylar arasynda kásibı qatynastardy qurýǵa kómektesip, redaktsııalyq saıasatta metrıkalardyń keńinen qoldanylýyna jaǵdaı jasamaq.

«Chartbeat kompanııasy qazaqstandyq BAQ-qa búkil álemdegi eń iri redaktsııalarda tabysty túrde qoldanylyp otyrǵan derekterdi taldaý salasyndaǵy ozyq tehnologııalardyń artyqshylyqtaryn qoldanýǵa kómektese otyryp, olarmen jumys jasaýǵa múmkindik alyp otyr jáne buǵan qýanyshty. Qazirgi tańda jýrnalıstıka sapasy burynǵydan asa úlken mańyzǵa ıe, sondyqtan osy seriktestik aıasynda iri ne shaǵyn bolsyn, 25 basylymnyń árqaısysyna óz oqyrmandaryna erekshe deńgeıde áser etýge jáne jumys sapasyn kóterýge kómektespek», - dep atap ótti Djıll Nıkolson.

Jańa resýrs naqty ýaqyt rejiminde derekter analıtıkasyn kelesi bes basty kórsetkish boıynsha kórsetedi: saıtqa kirýshiler, biregeı qoldanýshylar, geoderekter, traffık kózderi, 24 saǵat, 7 kún jáne 30 kún ishindegi eń úzdik jarııalanymdar týraly aqparat. Saıtqa kirýshilerge qatysýshy portaldar arasynda usynylǵan kórsetkishter boıynsha salystyrmaly analız jasaý, sondaı-aq, bir aı ishindegi analıtıkany júktep alý múmkindigi qoljetimdi bolmaq.

Anyqtama. Ótken jyldyń tamyzynda redaktsııalar jumysynda onlaın metrıkalardy jáne Ortaq derekter panelin qoldaný jónindegi joba iske qosyldy. Joba Qazaqstandaǵy AQSh elshiligi arqyly Innovatsııalar qory arqyly qarjylandyrylady. Jobaǵa qatysýshylar Charbeat qyzmetterin bir jyl boıy tegin qoldanýǵa múmkindik alyp otyr. Bul - jobaǵa qatysatyn 25 onlaın-medıaǵa derekterdi analıtıka salasyndaǵy ınnovatsııalyq quraldarǵa bir jyl boıy tegin qol jetkizýge múmkindik beretin Qazaqstandaǵy tuńǵysh ári jalǵyz joba. Ol Qazaqstandaǵy AQSh elshiligi arqyly Innovatsııalar qory esebinen qarjylandyrylyp otyr. Joba operatory - Qazaqstan Baspasóz klýby. Jobany aıqyn etý jáne onyń júzege asyrylýyna monıtorıng júrgizý maqsatynda táýelsiz Qamqorshylar keńesin qurý týraly sheshim qabyldandy. Onyń quramyna naqty naryqtyń ókilderi - medıa sarapshylary jáne IT-tehnologııa salasyndaǵy mamandar kirip otyr. Jobanyń ekinshi jylynda Chartbeat jobanyń birinshi jylyna qatysqan 25 BAQ-qa 70% shegerimdi usynady.