Qazaqstanda ákimshilik is júrgizý salasy keńeıtilmek
Qazaqstanda jarııa-quqyqtyq daýlardy azamattyq sot isin júrgizýden ákimshilik is júrgizýge kezeń-kezeńimen aýystyrylady.
Bul týraly Parlament Májilisinde «Qazaqstan Respýblıkasynyń keıbir zańnamalyq aktilerine ákimshilik ádilet salasyn jetildirý jáne keńeıtý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde QR Ádilet vıtse-mınıstri Alma Muqanova aıtty, dep habarlaıdy QazAqparat tilshisi.
«Jarııa-quqyqtyq daýlardy azamattyq sot isin júrgizýden ákimshilik is júrgizýge kezeń-kezeńimen aýystyrýdyń oryndylyǵyn atap ótý mańyzdy. Qazirgi kezde ákimshilik sot isin júrgizýdiń sot praktıkasyn qalyptastyrý protsesi júrip jatqandyqtan, bul tezıs eskerilip otyr. Sonymen qatar, mandandyrylǵan aýdanaralyq ákimshilik sottaryna túsetin shaǵymdardyń ósýi baıqaldy. Memlekettik organdar ákimshilik rásimderdi júrgizý tártibine, qoldanystaǵy zańnama normalaryn, sondaı-aq ákimshilik ister boıynsha sot praktıkasyn qoldanýǵa ústirt ári tym resmı qarap otyr. Bul kemshilikti elimizdiń sottary anyqtap jatyr», - dedi A. Muqanova.
Osy oraıda ol jarııa-quqyqtyq daýlardy Azamattyq protsestik kodeksinen Ákimshilik rásimdik-protsestik kodeksine kezeń-kezeńmen aýystyrýdyń oryndylyǵyn aıtty.
«Bul máseleni pysyqtaý aıasynda Ádilet mınıstrligi Azamattyq protsestik kodeksi isteriniń eki sanatyn aıqyndady. Sondyqtan bul isterdi aýystyrý oryndy ári ýaqtyly dep sanaımyz», - dedi vıtse-mınıstr.
Onyń sózine qaraǵanda, normatıvtik-quqyqtyq aktiniń zańdylyǵyna daý aıtý týraly ister boıynsha is júrgizýdi aýystyrý qarastyrylǵan.
«Bul zań jobasy aıasynda Azamattyq protsestik kodeksiniń 30-taraýyn (normatıvtik quqyqtyq aktiniń zańdylyǵyn daýlaý týraly ister boıynsha is júrgizý) Ákimshilik rásimdik-protsestik kodekke aýystyrý eskerilgen. Azamattarǵa vedomstvolyq buıryq, qaýly, ákim sheshimi zań talaptaryna sáıkes kelmeıdi dep sanaıtyny týraly talap-aryz berýi jetkilikti bolady. Óz kezeginde osy normatıvtik-quqyqtyq aktini qabyldaǵan organdarǵa tıisti dálel aıtý boıynsha jumysty iske asyrý mindeti júkteledi. Bul baǵytta qarapaıym azamattar dálel aıtyp óz ýaqytyn ketirmeıdi, tek talap-aryzdy ǵana joldaıdy», - dedi Alma Muqanova.
