Qazaqstanda ákimder úshin eki jyl synaq merzimin engizý usynyldy

ASTANA. KAZINFORM — Májilis depýtaty Baqytjan Bazarbek ákimder úshin eki jyldyq synaq merzimin engizýdi usyndy.

Halyq qalaýlysynyń aıtýynsha, atalǵan merzim aıaqtalǵannan keıin óńir basshysynyń jumysy naqty makroekonomıkalyq kórsetkishter boıynsha baǵalanýy tıis.

— Nátıje bolmasa — ákim qyzmetinen ketýi kerek, sebebi bul — tıimsizdik kórsetkishi. Meniń oıymsha, halyq dál osy radıkaldy tásildi kútip otyr, — deıdi Baqytjan Bazarbek Májiliste ótken Úkimet saǵatynda.

Aıta keteıik, bıyldan bastap barlyq aýdan ákimderin halyq tikeleı saılaıdy. 

Eske sala ketsek, Shyǵys Qazaqstan oblysynda qala men aýdan ákimderiniń jumysy KPI kórsetkishteri boıynsha baǵalanady. 

Sondaı-aq bıyl sáýirde Eýrazııalyq ıntegratsııa ınstıtýtynda ákimderdi tikeleı saılaý ınstıtýtynyń damýy talqylandy.