Qazaqstanda akkýmýlıator baǵasy qansha
ASTANA. KAZINFORM — Qazaqstanda kólik akkýmýlıatorynyń baǵasy óńirler men batareıa syıymdylyǵyna qaraı ártúrli bolyp tur. Kazinform tilshisi barlyǵy 19 qaladaǵy baǵany salystyrǵan kezde qaı óńirde az, qaı aımaq júrgizýshileri kóp aqsha shyǵyndaıtynyn bildi.
40-60 A/saǵ akkýmýlıatory: eń tómen jáne eń joǵary baǵa
Suranysqa ıe 40-60 A/saǵ syıymdylyǵyndaǵy akkýmýlıator baǵasy iri megapolısterde joǵary bolyp tur.
Eń arzany Taraz ben Túrkistan qalalarynda satylyp jatyr. Munda baǵa 25 000 teńgeden bastalady. Al Aqtóbe qalasynda 26 500 teńge, Taldyqorǵanda 26 000 teńge, al Qyzylordada 29 000 teńge jáne odan joǵary.
Al eń joǵary baǵa Astana qalasynda bolyp tur. Munda 180 000 teńgege deıin jetedi. Almaty, Pavlodar, Qaraǵandy men Shymkentte de baǵa keıber dúkende 150 000 teńgege deıin barady.
ıAǵnı, Taraz qalasynda eń arzany, Astana qalasynda eń qymbaty satylady. Eki qaladaǵy akkýmýlıator baǵasynyń aıyrmashylyǵy 155 myń teńgege jetti. Baǵa elimizdiń ońtústigi men batysyndaǵy qalalarda arzan, al el astanasy men óndiristi ólkelerde joǵary bolyp tur.
70-90 A/saǵ akkýmýlıatory: baǵa aıyrmashylyǵy joǵary
Jol talǵamaıtyn jáne dızel otynymen júretin kólik ıeleri syıymdylyǵy joǵary akkýmýlıator satyp alady. Munda da baǵada biraz aıyrmashylyq bar.
Elimiz boıynsha eń tıimdi baǵa Aqtóbe qalasynda bolyp tur. Munda 35 000 teńgeden bastalady. Atyraýda — 50 000 teńge, Semeıde — 50 000 teńge, Óskemende — 50 000 teńge jáne Oralda — 50 000 teńge jáne odan joǵary.
Eń joǵary baǵa Astana qalasynda. Munda 220 000 teńgeden bastalady. Almaty men Pavlodarda 200 000 teńgege jetip tur. Sonymen birge Jezqazǵan qalasynda keı jerlerde baǵa 190 000 teńgege, al Qaraǵandyda 185 000 teńgege jetti.
Óńirler arasyndaǵy, ıaǵnı, Aqtóbe men Astanadaǵy baǵa aıyrmashylyǵy 185 myń teńgege deıin jetti.
Taldaý nátıjesine súıensek, eki sanattaǵy akkýmýlıator baǵasy Taraz, Túrkistan, Aqtóbe men Taldyqorǵanda arzan. Al eń joǵary baǵa Astana, sonymen birge Almaty, Pavlodar men Qaraǵandyda tirkeldi.
Ásirese elimizdiń ońtústiginde baǵa tómen. Al Astana men iri qalalarda baǵa ózgege qaraǵanda edáýir joǵary. Bul qalalardaǵy joǵary sapaly brend taýarlardyń kóp bolýy baǵaǵa áser etýi múmkin.
Sóıtip óńirler arasyndaǵy akkýmýlıator baǵasynyń aıyrmashylyǵy 150 — 180 myń teńgege jetti. Kólik ıeleri baǵa akkýmýlıatordyń tehnıkalyq negizdemesine ǵana emes, aımaqtyń qaıda ornalasqanyna da baılanysty ekenin uqqany durys.
Buǵan deıin elimizdegi kosmetologtardyń qyzmeti týraly jazǵanbyz.