Qazaqstanda ákimshilik sottar qurylady

NUR-SULTAN. QazAqparat - Azamattardyń quqyqtaryn qorǵaýdy kúsheıtý maqsatynda respýblıkada 21 jańa sot qurylady. Bul týraly QR Joǵarǵy soty janyndaǵy Sottardyń qyzmetin qamtamasyz etý departamentiniń basshysy Naıl Ahmetzakırov málim etti, dep habarlaıdy QazAqparat.

2021 jyldyń shildesinen bastap respýblıkada Ákimshilik rásimdik-protsestik kodeks qoldanysqa enedi. Kodeks bılik organdarymen daý-damaılardy qaraý barysynda azamattardyń quqyqtaryn qorǵaýdy sapalyq jańa deńgeıge shyǵarýǵa baǵyttalǵan.

«Halyqaralyq praktıkada jekelegen sottardy qurý modeli ózin-ózi aqtady. Sondyqtan bizde derbes ákimshilik sottar qurylatyn bolady. Olar ákimshilik quqyqbuzýshylyqtar týraly isterdi qaramaıdy. Ákimshilik quqyqbuzýshylyqtar týraly kodeks boıynsha jumys istep jatqan sottardyń ataýy 2021 jyldyń 1 shildesinen bastap ózgeredi.

Qazirgi tańda Departament ákimshilik ádilet júıesin engizý boıynsha aýqymdy daıyndyq jumystaryn júrgizýde. 21 jańa ákimshilik sot qurylady, olardyń 17-si – oblys ortalyqtarynda, qosymsha 4-eýi - Qasqeleń, Semeı, Jezqazǵan jáne Ekibastuzda ashylady. Jańa sottar qoldanystaǵy shtattyq keste sheńberinde qurylady», - dedi N.Ahmetzakırov.

Sondaı-aq málim etilgendeı, ınfraqurylymdy damytý aıasynda Arys aýdandyq, Sátbaev qalalyq jáne Jambyl oblystyq sottary ǵımarattarynyń qurylysy bastaldy. 100 sot ǵımaratyna kúrdeli jóndeý júrgizildi.