Qazaqstanda ákimshilerge bankrottyq protsedýrasy barysynda nesıe alýǵa múmkindik berilmek
ASTANA. QazAqparat - Qazaqstanda ákimshilerge bankrottyq protsedýrasy barysynda nesıe alýǵa múmkindik berý josparlanýda. Bul týraly búgin QR Qarjy mınıstrliginiń Memlekettik kirister komıteti Boryshkerlermen jumys jónindegi basqarmasynyń jetekshisi Aıgúl Ýálıeva málim etti.
«Munan ary zańnamalyq turǵyda ákimshilerge bankrottyq protsedýrasy barysynda nesıe alý jáne mundaı nesıelerdi óteý barysynda basymdyq jasaý, nesıe berýshilerge ákimshilerdiń áreketin/áreketsizdigine jáne sot sheshimderine shaǵymdaný quqyǵyn berý josparlanýda», - dedi ol.
A.Ýálıevanyń aıtýynsha, «Ońaltý jáne bankrottyq týraly» Zańǵa kózdelgen jáne qabyldanǵan barlyq ózgertýler jumys istep turǵan bıznesti saqtap qalýǵa, qaryzdardy óndirip alý deńgeıin arttyrýǵa jáne bankrottyq protsedýrasy merzimin qysqartýǵa baǵyttalǵan.
Sonymen qatar ol óz baıandamasynda 2014 jyldyń qorytyndysyna sáıkes Qazaqstan Dúnıejúzilik banktiń «Doing Business» reıtıngisiniń «Tólem qabiletsizdigine ruqsat berý» ındıkatory boıynsha 19 tarmaqqa óz ustanymyn jaqsartyp, 63-shy oryndy ıelengenin atap ótti.
