Qazaqstanda aqyly joldardan jınalǵan qomaqty qarajat qaıda jumsalyp jatyr
ASTANA. KAZINFORM — Aqyly joldardan túsken qarajattyń negizgi bóligi tehnıka satyp alýǵa jumsalyp jatyr. Bul týraly «Qazavtojol» UK» AQ basqarma tóraǵasy Darhan Imanashev málim etti.
— Byltyr aqyly joldardan 87 mlrd teńge jınaldy. 2026 jylǵy jospar aıasynda 97-100 mlrd teńge jınalýy múmkin. Aqyly joldardan túsetin barlyq kiris avtomobıl joldaryn kútip ustaý men damytýǵa baǵyttalady, — dedi Darhan Imanashev Ortalyq kommýnıkatsııalar qyzmetindegi baspasóz máslıhatynda.
Osy oraıda ol avtojoldardy kútip ustaýǵa jınalǵan qarajattyń 30 paıyzy jumsalatynyn aıtty. Sonymen qatar 10 paıyzy joldardaǵy beınebaqylaý kameralary men qyzmetkerlerge baǵyttalady.
— Jalpy, qarajattyń basym bóligin tehnıka satyp alýǵa jumsap kelemiz. Máselen, eki jylda 1200 arnaıy tehnıka satyp aldyq. Al bıylǵy jospar aıasynda osyndaı 800 tehnıkany almaqpyz. Atap aıtqanda, bizge 2 myńǵa jýyq tehnıka kerek. Sol sebepti osy máselege erekshe nazar aýdaryp otyrmyz, — dedi kompanııa basshysy.
Buǵan deıin habarlanǵandaı, elde sý tasqyny qaýpi bar jol ýchaskeleri azaıdy.
