Qazaqstanda aqyly qyzmetterdiń baǵasy sońǵy bes jarym jylda alǵash ret tómendedi
ASTANA. KAZINFORM — Qazaqstanda ınflıatsııanyń baıaýlaýyna aqyly qyzmetter naryǵyndaǵy baǵanyń tómendeýi áser etti. Qazan aıynda qyzmetter quny azdap arzandap, bul sońǵy bes jarym jyldaǵy alǵashqy tómendeý bolyp tirkeldi. Bul týraly Ulttyq statıstıka bıýrosy habarlady.
Ulttyq statıstıka bıýrosynyń derekterine sáıkes, 2025 jylǵy qazan aıynda aqyly qyzmetter baǵasy qyrkúıekpen salystyrǵanda 0,8 paıyzǵa tómendegen. Bul kórsetkishtiń aılyq mánde tómendeýi 2020 jylǵy mamyrdan beri alǵash ret tirkelip otyr.
Resmı esepterge súıensek, qazan aıynda «Turǵyn úı-kommýnaldyq qyzmetter, sý, elektr energııasy, gaz jáne ózge de otyn túrleri» sanatynda baǵalar aıyna 3,5 paıyzǵa tómendegen. Tolyq derekter áli jarııalanbaǵanymen, belgili bolǵany — Almaty qalasynda sýdy tutyný kólemine baılanysty dıfferentsıaldy tarıfter júıesine ýaqytsha úzilis engizilýi nátıjesinde sýmen jabdyqtaý tarıfteri tómendegen.
— Aqyly qyzmetterdiń arzandaýy jalpy ınflıatsııa deńgeıine de áser etti. Qazan aıynda baǵa ósimi 0,5 paıyzdy qurap, bul kórsetkish sońǵy jeti jyldaǵy eń tómengi deńgeı retinde tirkeldi. Al azyq-túlik taýarlary qyrkúıekpen salystyrǵanda 1 paıyzǵa, al azyq-túlikke jatpaıtyn taýarlar 1,2 paıyzǵa qymbattady, — delingen habarlamada.
Sonymen qatar ınflıatsııanyń qyzmetter segmentindegi jyldyq kórsetkishi qyrkúıektegi 15,3 paıyzdan 12,9 paıyzǵa deıin tómendedi. Bul jalpy ınflıatsııa qarqynyn 12,9 paıyzdan 12,6 paıyzǵa deıin baıaýlatýǵa múmkindik berdi. Al azyq-túlik jáne azyq-túlikke jatpaıtyn taýarlar segmentterinde baǵa ósimi jalǵasyp jatyr.
Buǵan deıin Inflıatsııa deńgeıin baqylaý jáne tómendetý sharalary qaıta qaralatynyn jazǵanbyz.