Qazaqstanda aqyly avtojoldardy tegin paıdalanatyn kólik sanattary belgili boldy

ASTANA. KAZINFORM – «Avtomobıl joldary týraly» zańǵa sáıkes, birqatar kólik quraldary aqyly avtomobıl joldarynan ótýde tólemnen bosatylady, dep habarlaıdy QazAvtoJol.

1. Qyzmettik mindetin atqarý kezinde:

• jedel medıtsınalyq járdem;

• avarııalyq-qutqarý qyzmetteri;

• quqyq qorǵaý organdary;

• kóliktik baqylaý organdary;

• arnaýly memlekettik organdar;

• QR Qarýly Kúshteri, basqa da áskerler men áskerı quralymdar;

• Ulttyq operator jáne jekeshe áripteske tıesili, joldy kútip-ustaýǵa arnalǵan arnaıy tehnıka;

• janýarlar dúnıesin qorǵaý salasyndaǵy ýákiletti organnyń arnaıy kóligi.

2. Qala mańyndaǵy jáne irgeles eldi mekender qatynasynda:

• aýdan nemese oblys ortalyqtaryna, astanaǵa jáne respýblıkalyq mańyzy bar qalalarǵa qatynaıtyn turaqty jolaýshylar avtobýstary;

• bir aýdan sheginde júretin, sol aýdanda tirkelgen avtobýstar;

• júk kólikteri men aýylsharýashylyq tehnıkalary – sý tosqaýyldary men temirjol ótkelderin kesip ótý úshin;

• bir aýdan sheginde júretin, sol aýdanda tirkelgen jeke jáne zańdy tulǵalardyń jeńil avtomobılderi.

3. Uly Otan soǵysy ardagerleriniń jeńil avtomobılderi.

Bul kólikterdiń memlekettik nómirleri arnaıy topqa engizilip, aqyly joldaǵy baqylaý júıesinde tólem alynbaıdy.

Jeńildikti alý úshin tıisti sanat ókilderi «QazAvtoJol» UK» AQ-ǵa resmı ótinim jiberip, kólik nómirin jáne avtobýstar úshin marshrýt paraǵyn qosa usynýy qajet.

Aıta keteıik, Aqyly joldardyń jóndelip jatqan ýchaskeleri úshin tólem alynbaıdy.