Qazaqstanda ákelerdiń bala tárbıesine qatysýy nege tómen
ASTANA. KAZINFORM – Elimizde ákelerdiń bala tárbıesine belsendi qatysýyn arttyrý qajet. Bul týraly Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Kambarov Otbasy kúnine arnalǵan «Dáýirler toǵysyndaǵy otbasy» dóńgelek ústelinde málimdedi.
Onyń aıtýynsha, Qazaqstandaǵy ákeler ınstıtýtyna júrgizilgen zertteý kóptegen otbasynda ákeniń bala tárbıesine jetkilikti deńgeıde aralaspaýy ózekti másele bolyp otqanyn kórsetti.
– Áıelderdiń 52,2 paıyzy jáne erlerdiń 47,2 paıyzy ákeniń bala tárbıesine jetkiliksiz qatysýyn ózekti másele dep sanaıdy. Erlerdiń 54,9 paıyzy balaǵa materıaldyq jaǵdaı jasaýdy onyń tárbıesine qatysýdan mańyzdyraq dep esepteıdi. Al 60,4 paıyzy bala tárbıesine ýaqyttyń jetispeıtinin aıtqan, – dedi Qaırat Kambarov.
Komıtet tóraǵasynyń sózinshe, otbasylyq tájirıbemen qatar, ata-analarǵa quqyqtyq, psıhologııalyq jáne pedagogıkalyq bilimniń qoljetimdiligin qamtamasyz etý qajet.
Zertteý nátıjesi qazaqstandyqtardyń jartysyna jýyǵy otbasylyq ómirde óz ata-anasynyń úlgisine súıenetinin de kórsetti. Mundaı ustanymdy erlerdiń 51,9 paıyzy jáne áıelderdiń 49,7 paıyzy atap ótken.
Buǵan deıin júrgizilgen zertteýlerge sáıkes, Qazaqstan jastarynyń 80,1 paıyzy otbasy qundylyqtaryn ómirindegi basty qaǵıdalardyń biri dep sanaıdy.
Eske salaıyq, elimizde 7-13 qyrkúıek aralyǵynda ótetin Otbasy kúnine arnalǵan aptalyq bastaldy.
