Qazaqstanda aqbókenderdiń sany kóktemgi sanaqtan keıin belgili bolady - AShM

ASTANA. QazAqparat - 2015 jyly jappaı qyrylǵan aqbókenderdiń endi naqty sany 2016 jyldyń kóktemgi sanaǵynan keıin belgili bolady. Bul týraly búgin Aýyl sharýashylyǵy mınıstrligi Orman sharýashylyǵy jáne janýarlar álemi komıtetiniń otyrysynda komıtet tóraǵasynyń mindetin atqarýshy Qaırat Ústemirov málim etti.

«2015 jyldyń basynda Qazaqstanda barlyǵy 295 myń aqbóken bar edi. Alaıda, ókinishke oraı, Betpaqdalada aqbókender jappaı qyryldy. Endi, tiri qalǵan jáne kóbeıgen aqbókenderdiń sany 2016 jyldyń kóktemgi sanaǵynda belgili bolady. Qazir aqbókender Qazaqstannyń úsh dalasyn; Betpaqdalany, Oral men Ústirtti mekendeıdi. ıAǵnı, aqbókenderdiń mekendeıin jerleri 10 oblystyń aýmaǵynda jatyr. 2000 jyldan beri aqbókender mekendeıtin aýmaq úsh esege kóbeıgen»,-dep túsindirdi Q.Ústemirov.

Onyń aıtýynsha, aqbókenderdiń jappaı qyrylýy olardyń mekendeıtin jerlerin ózgertken joq. «Tek olardyń sany azaıdy. Onyń ústine, aqbókender meken etetin aýmaq keńeıgen saıyn, shaǵyn úıirlerge bóline bastaǵan. Mysaly, buryn biren-saran aqbókeni bar nemese tipti aqbóken kezdespeıtin Jambyl oblysy men OQO aýmaǵynda aqbókenderdiń myń basy kezdesedi»,-dep túsindirdi ol.

Esterińizge sala keteıik, 2015 jyldyń mamyrynda Qazaqstanda aqbókenderdiń jappaı qyrylý faktisi tirkelip, oqıǵa saldarynan 300 myń bas saıǵaq qyrylyp qalǵan edi.