Qazaqstanda aqbókenderdi zańsyz aýlaý faktilerin anyqtaý sońǵy jyldary 50 paıyzǵa ósti
Onyń aıtýynsha, 2012 jyly qylmystyq jazalanatyn 33 qaskóılik árekettiń joly kesilgen bolsa, 2014 jyly osyndaı 71 áreket anyqtaldy.
«Al 2015 jyldyń basynan kúni búginge deıin 63 qylmystyq jazalanatyn brakonerlik áreket anyqtaldy. 2012-2015 jyldar aralyǵynda bizdiń kásiporynnyń ınspektorlary aqbókenge jáne basqa da óte sırek kezdesetin janýarlardy zańsyz aýlaýǵa qatysty 213 qylmystyq jazalanatyn brakonerlik áreketti anyqtady. Sóıtip, tabıǵatty qorǵaý zańnamasyn buzǵandarǵa qatysty 814 ákimshilik materıaldar daıyndaldy», - dedi E. Álzaqov.
Bul jerde Erzat Ýálıhanuly elimizde aqbókender men sırek kezdesetin jáne quryp ketýdiń aldynda turǵan janýarlardy memlekettik turǵyda qorǵaý maqsatynda ınspektorlardyń sany men tehnıkalardyń kóbeıtilip jatqanyn jetkizdi.
«2003 jyly bizdiń kásiporynnyń bazasynda tuńǵysh ret kıikterdi, ıaǵnı aóbókenderdi memlekettik qorǵaý qyzmeti qurylyp, bul jumysqa 59 ınspektor jumyldyrylǵan edi. Bıyl, kıikter jáne sırek kezdesetin basqa da jan-janýarlardy qorǵaý jáne saqtaý aıasynda bizdiń kásiporynnyń bazasynda Baqylaý-ınspektorlyq basqarma quryldy. Onyń quramynda úsh óńirlik fılıal bar. Ortalyq fılıal Astanada, Batys fılıal Aqtóbede jáne Ońtústik fılıal Shymkentte ornalasqan. Sondaı-aq 15 tirek pýnktteri bar. Búgingi tańda barlyǵy 220 ınspektor óz jumysynda 91 jeńil avtokólikti, 13 júk kóligin jáne qarda júrgish kólikter men mototsıklderdi paıdalanady», - dedi E. Álzaqov.
Aıta ketelik, ótken ǵasyrdyń elýinshi jyldary Qazaqstanda aqbókenderdiń sany 1,5 mln. jýyq bolǵan eken. Alaıda, ár túrli indetter, qatty aıazdar, jyrtqysh ańdar jáne jappaı suǵanaq ańshylyq áreketterdiń saldarynan 2003 jylǵa qaraı, elimizde 21 myńnan sál ǵana astam kıikter qaldy.
Al qazirgi tańda olardy qorǵaýǵa qatysty qoldanylǵan memlekettik sharalardyń arqasynda kıikterdiń sany jyldan-jylǵa ósip keledi. Qazaqstanda kıikter, ıaǵnı aqbókender úsh aımaqta ómir súretini belgili. Búgingi tańda Betpaqdala tobynda 25-30 myń shamasynda, Ústirt tobynda 2 myńǵa jýyq, al Jaıyq tobynda 51 myńdaı aqbóken ómir súredi.
Jalpy, aqbókender ósip-ónýiniń tyǵyzdyǵy men úıir kólemi azaıa tursa da, taralý aımaǵy jáne mekendeý alańy ózgerissiz qaldy. Ol 123 mln. gektardy quraıdy. Demek, ınspektorlardyń jumysy da, olarǵa júktelgen jaýapkershilik te tómendegen joq degen sóz. Olar janýarlardyń barlyq mekendeý aýmaqtaryn kúzetýmen aınalysýda.