Qazaqstanda aqaýy bar jańa avtokólikterge qatysty problemalar qalaı sheshilip jatyr

ASTANA. KAZINFORM – Sońǵy ýaqytta avtokólik satyp alýǵa qatysty tutynýshylar tarapynan túsken shaǵymdar jıilep, birneshe rezonansty jaǵdaı ádil sheshildi, dep habarlaıdy Saýda jáne ıntegratsııa mınıstrligi.

Almaty qalasynda birqatar turǵyn jańa kólikterindegi aqaýlarǵa baılanysty departamentke júgingen. Vedomstvo ókilderi avtosalondarmen kelissóz júrgizip, tutynýshylardyń quqyǵyn qorǵaýǵa shara qoldanǵanyn málimdedi.

Bir almatylyq turǵyn qozǵaltqyshtaǵy kúrdeli aqaýdy baıqaǵanyn aıtyp, zańgerden keńes alǵannan keıin avtosalon kóliktiń tolyq qunyn – 6,99 mln teńgeni qaıtarǵan. Departament mamandary ekinshi jaǵdaıda berilis qorabyndaǵy aqaý, artqy kameranyń istemeýi jáne janarmaı bagy qaqpaǵynyń ashylmaýyna baılanysty tutynýshyǵa 14,9 mln teńge ótelgenin atap ótti.

Úshinshi avtokólik ıesi de berilis qorabyndaǵy aqaýǵa baılanysty júgingen, nátıjesinde oǵan 13,9 mln teńge qaıtarylǵan.

Shymkentte elektromobıl ıesi kóliktiń júris qory óndirýshiniń parametrlerine sáıkes kelmeıtinin málimdep, batareıanyń buryn qoldanylǵan bolýy múmkin degen kúmán keltirgen. Másele mamandardyń aralasýymen sheshilip, satýshy tutynýshyǵa 21 mln teńgeni qaıtarýǵa kelisim bergen.

Ulytaý óńirinde jańa avtokóliktiń qozǵaltqyshy men kondıtsıoner júıesinde aqaý bar ekeni anyqtalǵan. Túsindirý jáne kelissózderden keıin avtosalon kólikti tolyqtaı jańa avtokólikke aýystyrǵanyn habarlady. Onyń quny – 9,09 mln teńge.

Mınıstrlik ókilderi bul mysaldar aqaýy bar avtokólik satyp alǵan jaǵdaıda tutynýshylardyń quqyǵy tıimdi qorǵalýy múmkin ekenin atap ótti.

Aıta keteıik, aqaýy bar jańa kólikti qaıtaryp berýge kedergi keltiretin norma joıylady.