Qazaqstanda AITV-nyń ósý qarqyny 3 ese tómendedi
ASTANA. QazAqparat - Qazaqstanda adamnyń ımmýn tapshylyǵy vırýsynyń (AITV) ósý qarqyny 3 ese tómendedi. Bul týraly búgin Astana qalalyq SPID-ke qarsy kúres ortalyǵynyń bas dárigeri Sábıt Ábdiraıymov aıtty, dep habarlaıdy QazAqparat.
«Respýblıkalyq JITS-tiń aldyn alý jáne kúres ortalyǵynyń málimetinshe, sońǵy 5 jylda AITV-nyń ósý qarqyny elimizde úsh esege tómendedi. Sońǵy 10 jyl ishinde AITV-men ómir súretin adamdardyń ólim-jitimi 2,6 esege, al anadan balaǵa berilý jaǵdaıy 4 esege azaıdy. Sońǵy 10 jylda AITV-ǵa testileýmen qamtý 2,5 esege ósti, árbir altynshy turǵyn óziniń AITV-dárejesin biledi. Jyl saıyn qala turǵyndarynyń 30 paıyzy AITV-ǵa testten ótedi. Bul úrdister úkimettiń AITV-nyń taralýyn boldyrmaý jónindegi is-áreketiniń tıimdiligin kórsetedi», - dedi ol «AITV-nyń bızneske áseri joq» taqyrybynda ótken baspasóz máslıhaty barysynda.
Onyń aıtýynsha, Qazaqstanda AITV ınfektsııasynyń taralýy tómen, ne bári 0,2 paıyzdy quraıdy. Al álemdik ortasha kórsetkish 1,6 paıyzǵa teń.
«AITV-men ómir súretin adamdardyń AITV juqtyrmaǵan adamdarmen quqyqtary teń ekendigin, olardy jumystan shyǵarýǵa, jumysqa qabyldaýdan bas tartýǵa, sondaı-aq basqa da quqyqtaryn buzýǵa jol berilmeıtindigin jumys berýshilerdiń bilgeni durys. AITV juqtyrǵan adamdar áriptesterine qaýip tóndirmeıdi. Sebebi, AITV aýamen jáne turmystyq-qatynas joldarymen berilmeıdi», - dedi Sábıt Ábdiraıymov.
Ortalyq bas dárigeriniń aıtýynsha, 2017 jyly Dúnıejúzilik ekonomıkalyq forýmnyń Jahandyq básekege qabilettilik ındeksinde «AITV-nyń 15-49 jas aralyǵynda taralýy» kórsetkishi boıynsha Qazaqstan (0,2% kórsetkishimen) 1-shi orynda turaqtanyp, AITV tómen taralǵan elder tobyna kirgen.
Foto: s.ura.news
