Qazaqstanda AITV-nyń aldyn alý, anyqtaý jáne emdeý júıesi kúsheıtildi

ASTANA. KAZINFORM — Búginde antıretrovırýstyq terapııa (ART) qabyldap júrgen AITV-men ómir súretin adamdardyń 93%-dan astamynda vırýs júktemesi tómen. Bul — memleket, halyqaralyq uıymdar jáne úkimettik emes qurylymdardyń birlesken jumysynyń nátıjesi, dep habarlaıdy DSM baspasóz qyzmeti.

Mundaı derekter 1 jeltoqsan — Dúnıejúzilik AITV-ǵa qarsy kúres kúni aıasynda «Qıyndyqtardan — ózgeristerge: AITV-ǵa jaýap» uranymen qorytyndylanǵan.

Qazaqstanda AITV-nyń aldyn alý, testileý, emdeý jáne kútim qyzmetterin jaqsartýǵa baǵyttalǵan ıÝNEIDS-tiń 95–95–95 strategııasy júzege asyrylyp jatyr. Qazirgi tańda:

• AITV-pen ómir súretin adamdardyń 85% óz mártebesin biledi;

• olardyń 92% antıretrovırýstyq terapııa qabyldaıdy;

• em qabyldaıtyndardyń 93% vırýs júktemesin tómen deńgeıde ustap otyr.

 

 Qazaqstanda «B=J» prıntsıpi qoldanylady: «Beımálim = juqtyrmaıdy». Osy prıntsıpke sáıkes, antıretrovırýstyq terapııany qabyldaıtyn jáne vırýs júktemesi tómendetilgen AITV-men ómir súretin adam óziniń jynystyq serigine vırýs tarata almaıdy. Bul tujyrym álemdik ǵylymı zertteýlermen tolyq rastalǵan.

 — Bıyl Densaýlyq saqtaý mınıstrligi AITV-ınfektsııasy kezinde medıtsınalyq kómek kórsetý standartyn bekitti. Qujat AITV-men ómir súretin adamdarǵa medıtsınalyq qyzmetterdiń sapasy, qoljetimdiligi men úzdiksizdigin arttyrýǵa, sondaı-aq aldyn alý sharalaryn jetildirýge baǵyttalǵan. Qazaqstanda DDSU usynǵan 12 profılaktıkalyq baǵdarlama baǵyttarynyń barlyǵy engizilgen, — deıdi QR DSM Dermatologııa jáne ınfektsııalyq aýrýlar ǵylymı ortalyǵynyń dırektory Roza Qýanyshbekova.

ART emin alý da jeńildedi: dıagnoz qoıylǵannan keıin em birden taǵaıyndalady jáne tegin beriledi. Búginde patsıentterdiń 90%-y quramynda dolýtegravır bar terapııa qabyldaıdy. Bul preparat DDSU tarapynan birinshi tańdaýly em retinde usynylǵan.

Sońǵy jeti jylda Qazaqstanda AITV-dan ólim-jitim tómendedi, halyq arasyndaǵy syrqattaný deńgeıi azaıdy, sondaı-aq juǵýdyń eki joly — qan arqyly (ınektsııalyq esirtki) jáne anadan balaǵa juǵý aıtarlyqtaı qysqardy.

Qoldanystaǵy aldyn alý jáne emdeý sharalarynyń arqasynda Qazaqstanda 15–49 jas aralyǵyndaǵy halyq arasynda AITV taralýy 0,3% deńgeıinde, al bul álemdik ortasha kórsetkish — 0,7%.

Budan buryn Pavlodar óńirinde AITV-nyń anadan balaǵa juǵý jaǵdaılary tirkelgenin jazǵan edik.