Qazaqstanda AITV ınfektsııasy bar balalardy qoldaýǵa baǵyttalǵan jańa joba iske qosylady
«Eńbek jáne halyqty áleýmettik qorǵaý mınıstrligi ıÝNISEF-pen birge AITV ınfektsııasy jáne basqa da sozylmaly aýrýlary bar balalardyń, olardyń áke-sheshesi men asyrap alýshylarynyń áleýmettik-ekonomıkalyq osaldyǵyn báseńdetýge baǵyttalǵan arnaıy jobany ázirlep jatyr. Joba aıasynda Jumyspen qamtý ortalyqtarynyń, JITS-tiń aldyn alý ortalyǵynyń, alǵashqy medıtsınalyq-áleýmettik kómek kórsetý uıymdarynyń mamandary oqytylady. Osylaısha atalǵan sanattaǵy balalardyń áleýmettik ınnovatsııalar men kásipkerlik túrleri boıynsha úzdik ádistemeler negizinde mashyqtaryn jetildirý kózdelgen. Jobany bastap ketýge 80 paıyz deńgeıde daıynbyz. Kelesi jyldan bastaımyz», - dedi Erlan Áýkenov «Balalyq shaqty qorǵaý júıesiniń tıimdiligi jáne balanyń ál-aýqaty: memleket pen azamattyq qoǵamnyń birigýi» taqyrybynda ótken baspasóz máslıhatynda.
Vıtse-mınıstr sonymen qatar QR Bala quqyqtary jónindegi ýákildiń bastamasymen Eńbek jáne halyqty áleýmettik qorǵaý mınıstrligi ákimdikterge AITV ınfektsııasy bar balalarǵa járdemaqy berýge keńes bergenin aıtyp ótti.
«Qazirgi tańda 12 óńirde bul járdemaqy júıesi jolǵa qoıylǵan. Qalǵan óńirlerde normatıvti-quqyqtyq aktilerge tıisti ózgerister engizilýde. Jalpy AITV ınfektsııasy bar 508 balanyń 379-y qazirdiń ózinde turaqty túrde járdemaqy alyp jatyr. Biraq bul rette keıde ata-analardyń ózderi járdemaqy alýdan bas tartyp jatady», - dedi ol.
