Qazaqstanda AI-startaptar men zertteýlerdi qoldaýdyń jańa baǵdarlamalary iske qosylady
ASTANA. KAZINFORM - Premer-mınıstr Oljas Bektenov Pavlodar oblysyndaǵy «Derekterdi óńdeý ortalyqtary alqaby» jobasynyń aǵymdaǵy jaǵdaıy jóninde keńes ótkizdi, dep habarlaıdy Úkimettiń baspasóz qyzmeti.
Joba Memleket basshysy Qasym-Jomart Toqaevtyń Ulttyq quryltaıdyń V otyrysynda jáne Jasandy ıntellektini damytý jónindegi keńestiń ekinshi otyrysynda qoıǵan mindetterin oryndaý maqsatynda júzege asyrylyp jatyr.
Júrgizilip jatqan jumystar týraly Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev, «Qazaqtelekom» AQ basqarma tóraǵasy Baǵdat Mýsın baıandady. Pavlodar oblysynyń ákimi Asaıyn Baıhanov qajetti ınjenerlik ınfraqurylymdy daıyndaý týraly aıtty.
Ekibastuz qalasyndaǵy qurylys alańynda geodezııalyq jumystar aıaqtaldy, ınjenerlik-geologııalyq izdenister júrgizilip keledi jáne bolashaq modýldik bloktarǵa arnalǵan shuńqyrlar ázirlenip jatyr. Qurylys tehnıkasy men mamandar jumyldyryldy. Qurylys jumystarynyń tolyq tsıkli 2026 jyldyń maýsym aıynda bastalady.
Jıyn barysynda úzdik halyqaralyq tájirıbe men tehnologııalyq áriptester talaptaryn eskere otyryp, elektr energetıkasy, derekterdi saqtaý jáne óńdeý, aqparattyq qaýipsizdik salalaryndaǵy tásilder qaraldy.
Jasandy ıntellekt jáne tsıfrlyq damý mınıstrligi jobaǵa álemdik tehnologııalyq kóshbasshylar, gıperskeılerler, jasandy ıntellekt jáne bultty esepteý salasyndaǵy jetekshi halyqaralyq kompanııalar qatarynan áleýetti qatysýshylardyń pýlyn qalyptastyrdy.
Joba sheńberinde alem.ai halyqaralyq ortalyq bazasynda jergilikti AI-ekojúıeni, zertteý bastamalaryn, kadrlar daıarlaýdy jáne jasandy ıntellekt salasyndaǵy startaptardy qoldaýdyń birlesken baǵdarlamalaryn damytý kózdelgen.
Jıyn qorytyndysy boıynsha Oljas Bektenov jaýapty memlekettik organdar men damý ınstıtýttaryna barlyq baǵyt boıynsha jumys qarqynyn arttyrýdy tapsyrdy. Jobany júzege asyrýdyń naqty nátıjeleri bir aıdan keıin Premer-mınıstrge usynylýy tıis.
Aıta keteıik, osyǵan deıin Toqaev Úkimetke «Derekterdi óńdeý ortalyqtarynyń alqaby» jobasyn muqııat pysyqtaýdy tapsyrǵan bolatyn.
