Qazaqstanda AI-Sana arqyly 700 myńnan astam AI-sertıfıkat berildi
ASTANA.KAZINFORM — Qazaqstanda jasandy ıntellekt salasyndaǵy kadrlardy daıarlaýǵa baǵyttalǵan AI-Sana ulttyq baǵdarlamasy iske asyrylyp otyr. Joba tsıfrlyq ekonomıka úshin bilikti mamandar qalyptastyrýǵa jáne bilim berý, ǵylym men ınnovatsııany biriktiretin jańa AI-ekojúıeni damytýǵa baǵyttalǵan. Bul týraly QR Ǵylym jáne joǵary bilim mınıstrligi málim etti.
AI-Sana — tsıfrlyq ekonomıka úshin kadrlar daıarlaý jáne jasandy ıntellektini damytý baǵytyndaǵy negizgi ulttyq bastamalardyń biri.
Búginde jasandy ıntellekt tehnologııalyq jáne ekonomıkalyq damýdyń mańyzdy faktorlarynyń birine aınaldy. Onyń qoldanylý aıasy bilim berý, ǵylym, densaýlyq saqtaý, ónerkásip, aýyl sharýashylyǵy jáne memlekettik basqarý salalaryn qamtıdy. Osyǵan baılanysty jasandy ıntellekt tehnologııalaryn ázirlep, olardy tıimdi qoldana alatyn bilikti mamandar daıarlaý memleket úshin strategııalyq mindetterdiń biri bolyp otyr.
QR Prezıdenti Qasym-Jomart Toqaevtyń tapsyrmasymen 2026 jyl Tsıfrlandyrý jáne jasandy ıntellekt jyly bolyp jarııalandy. Jasandy ıntellektini damytý ulttyq ekonomıkanyń básekege qabilettiligin arttyrýǵa jáne eldiń kadrlyq áleýetin nyǵaıtýǵa baǵyttalǵan memlekettik saıasattyń basym baǵyttarynyń biri retinde aıqyndaldy.
2024 jyly Memleket basshysy Úkimetke jasandy ıntellekt salasyndaǵy mamandardy daıarlaýǵa jáne bilim berý, ǵylymı zertteýler men tehnologııalyq kásipkerlikti biriktiretin ulttyq AI-ekojúıeni qalyptastyrýǵa baǵyttalǵan AI-Sana baǵdarlamasyn kezeń-kezeńimen iske asyrýdy tapsyrdy.
Prezıdent óz sózinde: «JI tehnologııalary salasyndaǵy otandyq jáne halyqaralyq bilim berý baǵdarlamalary elimizdiń kadrlyq áleýetin arttyrýǵa úles qosa alady. Úkimetke jasandy ıntellekt baǵytynda maman daıarlaýǵa arnalǵan AI-Sana baǵdarlamasyn kezeń-kezeńimen júzege asyrý máselesin qarastyrýdy tapsyramyn. Atalǵan baǵdarlama oqý, zertteý jáne startaptardy ázirleý úderisteri toǵysatyn dınamıkalyq ekojúıeni qalyptastyrýǵa yqpal etýge tıis. Álemniń jetekshi ýnıversıtetteriniń akseleratsııa tájirıbesin qoldanǵan durys. Jasandy ıntellektiniń paıdasyn Qazaqstannyń árbir turǵyny bilýi kerek. Onyń ne úshin qajet ekenin, qalaı durys qoldanylatynyn yjdahattyqpen túsindirgen jón», — dep atap ótti.
Prezıdent tapsyrmalaryn oryndaý aıasynda QR Ǵylym jáne joǵary bilim mınıstrligi joǵary bilim berý júıesin jańǵyrtý jáne AI-quzyretterdi damytý boıynsha júıeli jumys júrgizip keledi. Joǵary oqý oryndarynyń bilim berý baǵdarlamalaryna jasandy ıntellekt elementteri engizilip, ony oqý protsesinde qoldaný tásilderi jetildirilip jatyr. Sonymen qatar oqytýshylardyń biliktiligin arttyrý múmkindikteri keńeıtilip, ǵylymı-zertteý ınfraqurylymy damyp, halyqaralyq yntymaqtastyq nyǵaıtylýda.
Ǵylym, tehnologııa jáne kásipkerlik toǵysyndaǵy quzyretterge ıe jańa býyn mamandaryn daıarlaýǵa erekshe nazar aýdarylady. AI-Sana baǵdarlamasy dál osy maqsatqa qol jetkizý úshin júzege asyrylyp keledi.
AI-Sana — ınjenerlerdi, zertteýshilerdi jáne tehnologııalyq kásipkerlerdi daıarlaýǵa baǵyttalǵan ulttyq bastama. Baǵdarlama bilim berý, ǵylym jáne ınnovatsııany ushtastyra otyryp, stýdentterge jasandy ıntellekt tehnologııalaryn meńgerip qana qoımaı, olardy praktıkalyq sheshimder ázirleýge jáne óz jobalaryn iske asyrýǵa qoldanýǵa múmkindik beredi.
Baǵdarlamanyń alǵashqy kezeńinde bazalyq AI-quzyretter boıynsha oqýdan ótken jáne jetekshi halyqaralyq bilim berý platformalaryna qol jetkizgen stýdentterge 697 myńnan astam sertıfıkat berildi.
— Kelesi kezeń tájirıbelik daǵdylar men kásipkerlik quzyretterdi damytýǵa baǵyttalǵan. 2026 jylǵy sáýir aıynan bastap «Qazaqstan halqyna» qoǵamdyq qorynyń qoldaýymen AI-Sana baǵdarlamasynyń ekinshi kezeńi iske asyrylady. Onyń aıasynda Jasandy ıntellektini damytý jónindegi keńestiń múshesi Pol Kım ázirlegen baǵdarlama boıynsha 100 myń stýdent AI-kásipkerliktiń negizderin meńgerip jatyr, — delingen habarlamada.
Aldaǵy ýaqytta qatysýshylar jobalyq komandalarǵa birigip, ózderiniń tehnologııalyq sheshimderin ázirleıdi jáne olardy Astana Hub pen QazInnovations uıymdarynyń qatysýymen ınkýbatsııa jáne akseleratsııa baǵdarlamalaryna usynady. Bul perspektıvaly bastamalardyń naryqqa shyǵýyna jáne odan ári damýyna múmkindik beredi.
Baǵdarlamanyń ekinshi kezeńin iske asyrýǵa Stenford ýnıversıteti, Massachýsets tehnologııalyq ınstıtýty, Kremnıı alqabynyń venchýrlik qorlary jáne halyqaralyq bıznes-mektepterdiń ókilderin qosa alǵanda jetekshi halyqaralyq sarapshylar tartylǵan. Oqý materıaldary Pol Kımniń jetekshiligimen AQSh-tyń Zemex Inc. kompanııasynyń qatysýymen ázirlenedi. Sondaı-aq baǵdarlamaǵa Stanford University, Carnegie Mellon University, UC Berkeley, Johns Hopkins SAIS, Georgetown University, Boston University jáne basqa da halyqaralyq uıymdardyń ókilderi qatysady.
— Kelesi jarııalanymdarda AI-Sana baǵdarlamasynyń iske asyrylý tetikteri, stýdentter men oqytýshylarǵa beretin múmkindikteri, qol jetkizilgen nátıjeleri, sondaı-aq Qazaqstannyń tehnologııalyq bolashaǵyn aıqyndaıtyn mamandardy daıarlaýdaǵy joǵary oqý oryndarynyń úlesi týraly keńirek aqparat usynylady, — dep habarnlady vedomstvodan.
Jasandy ıntellektini damytý jáne joǵary bilikti kadrlyq áleýetti qalyptastyrý — elimizdiń ornyqty damýy men onyń jahandyq tsıfrlyq keńistiktegi básekege qabilettiligin nyǵaıtýdyń mańyzdy alǵysharttarynyń biri.
