Qazaqstanda AI Governance 500 JI-ofıtserlerin daıarlaý baǵdarlamasy iske qosyldy
ASTANA.KAZINFORM - Búgin Qazaqstanda memlekettik sektorda jasandy ıntellektini keńinen engizýge qabiletti basshylardy daıarlaýǵa baǵyttalǵan AI Governance 500 strategııalyq baǵdarlamasy aıasynda oqý bastaldy. Baǵdarlama QR Prezıdenti Ákimshiligi basshysy A.Dádebaıdyń jáne Úkimettiń tapsyrmasy boıynsha Jasandy ıntellekt jáne tsıfrlyq damý mınıstrligi men Memlekettik qyzmet isteriagenttiginiń birlesýimen júzege asyrylyp jatyr.
Alǵashqy legine 100 basshy qatysyp otyrǵan oqý baǵdarlamasynyń ashylýyna Premer-Mınıstrdiń orynbasary - Jasandy ıntellekt jáne tsıfrlyq damý mınıstri J.Mádıev, Prezıdenttiń kómekshisi Q.Esekeev, Memlekettik qyzmet isteri agenttiginiń tóraǵasy D.Jazyqbaı jáne Prezıdent Ákimshiligi basshysy hatshylyǵynyń meńgerýshisi Q.Tóleýshın qatysty.
Mınıstrlik málimetinshe, «AI Governance 500» baǵdarlamasy Digital Qazaqstan tujyrymdamasy aıasynda memlekettik kún tártibiniń strategııalyq maqsattaryna qol jetkizýdi qamtamasyz etetin, vedomstvo aralyq tsıfrlyq jobalardy bastamalap jáne súıemeldeı alatyn, olardyń arhıtektýralyq úılesimdiligin qamtamasyz etýge qabiletti tsıfrlyq basshylar - JI-ofıtserlerdiń turaqty kadrlyq rezervin qalyptastyrýǵa baǵyttalǵan.
Oqytýǵa Prezıdent Ákimshiligi men Úkimet apparaty qurylymdyq bólimsheleriniń basshylary, salalyq vıtse-mınıstrler, oblys ákimderiniń orynbasarlary, ortalyq memlekettik organdar men jergilikti atqarýshy organdar apparattarynyń basshylary, sondaı-aq kvazımemlekettik uıymdardyń jetekshileri qatysyp jatyr.
Baǵdarlama keshendi logıkaǵa sáıkes qurylǵan: jasandy ıntellekttiń róli men tsıfrlyq memlekettiń arhıtektýrasyn strategııalyq turǵydan túsinýden bastap, qatysýshylardyń vedomstvolar men óńirlerde engizýge daıyn tsıfrlyq transformatsııa jobalary men AI-bastamalaryn ázirleýine deıingi barlyq kezeńdi qamtıdy.
Aıta keteıik, Qazaqstanda «Jasandy ıntellekt týraly» jańa zań kúshine endi. Zańǵa qol qoıylǵan sátten bastap 60 kún ótti jáne belgilengen rásimderge sáıkes, búginnen bastap qujat tolyq kólemde qoldanysqa engizildi.