Elimizde agrosýbsıdııalaý júıesi ózgeredi: fermerler jeńildetilgen nesıege kóshiriledi
ASTANA. KAZINFORM - Memleket basshysynyń tapsyrmasyn oryndaý aıasynda Aýyl sharýashylyǵy mınıstrligi 2029 jylǵa deıin agroónerkásiptik keshen (AÓK) sýbektilerin taýarlyq sýbsıdııalaýdan jeńildetilgen kredıtteýge kezeń-kezeńimen kóshirý máselesi boıynsha vedomstvoaralyq jumys tobynyń otyrysyn ótkizdi.
Oǵan QR Parlamenti Májilisiniń depýtattary, memlekettik organdardyń, qarjy ınstıtýttarynyń, salalyq birlestikter men bıznes ókilderi qatysty.
-Bıýdjet qarajatynyń tıimdiligin arttyrý jáne sybaılas jemqorlyq táýekelderin tómendetý maqsatynda sýbsıdııalardy ońtaılandyrý jumystary turaqty júrgizilip keledi. Ótken jyly selektsııalyq-asyl tuqymdy jumystarǵa beriletin sýbsıdııalar, sondaı-aq aınalym qarajatyn tolyqtyrýǵa arnalǵan kredıtterdiń paıyzdyq mólsherlemesin sýbsıdııalaý toqtatyldy. Sonymen qatar AÓK-ti jeńildetilgen kredıtteý kólemin ulǵaıtý boıynsha jumystar júrgizildi, – dep atap ótti Aýyl sharýashylyǵy vıtse-mınıstri Azat Sultanov.
Sondaı-aq ol sózinde AÓK sýbektilerine kóktemgi egis jáne egin jınaý jumystaryna, qaıta óńdeý kásiporyndary men mal sharýashylyǵyna jyldyq «taza» 5%-ben jeńildetilgen nesıe jáne lızıng alýǵa múmkindik beretin balamaly qarjylyq quraldar engizilgenin atap ótti.
Ótken jyly jeńildetilgen kredıtteýdiń jalpy kólemi alǵash ret 1 trln teńgege jetti. Bıyl da bul tájirıbe jalǵaspaq.
Otyrys barysynda AÓK-ti memlekettik qoldaýdyń qoldanystaǵy sharalaryna, Mınıstrliktiń FAO-men birlesip júrgizgen sýbsıdııalaý júıesiniń tıimdiligi boıynsha taldaý nátıjelerine, sondaı-aq taýarlyq sýbsıdııalardy jikteý men qoldanýdyń halyqaralyq tájirıbesine nazar aýdaryldy.
Qatysýshylar taýarlyq qoldaýdan jeńildetilgen kredıtteýge kóshý joldaryn talqylap, salany qoldaý júıesin odan ári jetildirý boıynsha usynystardy ortaǵa saldy. Sonymen qatar salanyń turaqtylyǵyn, ınvestıtsııalyq belsendilikti, qaıta óńdeý salasyn damytý men ishki naryqty qamtamasyz etý máselelerin eskere otyryp, keshendi ári teńgerimdi tásildiń qajettigi atap ótildi.
Barlyq usynystar bıznes, salalyq qaýymdastyqtar jáne sarapshylar pikirlerin eskere otyryp, jumys toby aıasynda odan ári pysyqtalatyn bolady.
Byltyr bankter aýyl sharýashylyǵyna 207 mlrd teńge nesıe bergen.
