Qazaqstanda agrosaqtandyrý deńgeıi óte tómen – depýtat
Depýtat ótken jyly elimizdegi búkil egistik alqabynyń 1%-ǵa jetpeıtin kólemi ǵana saqtandyrylǵanyn atap ótti.
Onyń aıtýynsha, Qazaqstanǵa qaraǵanda klımattyq qaýip-qater áldeqaıda tómen bolsa da Eýropalyq Odaq elderinde aýyl sharýashylyǵy alańdarynyń 60%-dan astamy saqtandyrý arqyly qorǵalady.
«Elimizde agrosaqtandyrýǵa suranystyń tómen bolýynyń negizgi sebepteriniń biri – memlekettik qoldaý kóleminiń azdyǵy men saqtandyrý ónimderin paıdalaný mádenıetiniń joqtyǵy dep oılaımyn. Búginde Qazaqstanda memleket aýyl sharýashylyǵy taýar óndirýshileri úshin saqtandyrý syıaqysynyń 50%-yna ǵana sýbsıdııa beredi. Agrosektory damyǵan elderde onyń mólsheri 60%-dan 95%-ǵa deıin aýytqyp otyrady», - dedi depýtat Senattyń jalpy otyrysynda.
Olga Býlavkına saqtandyrý mólsherine qatysty joǵary deńgeıde sýbsıdııalaýdyń asa mańyzdy ekenin aıtyp, ótken jyly elimizdegi qurǵaqshylyqtan Qostanaı jáne Aqmola oblystaryndaǵy 178 myń gektarǵa jýyq dándi daqyldar kúıip ketkenin mysalǵa keltirdi.
Bul rette óz egistikterin saqtandyrǵan jekelegen sharýalar ǵana saqtandyrý tólemderin alǵan bolatyn.
Óz kezeginde Aýyl sharýashylyǵy mınıstri Erbol Qarashókeev saqtandyrý máselesiniń rasynda da ózekti bolyp otyrǵanyn, saqtandyrý tájirıbesi keń taramaǵanyn aıtty.
«Sondyqtan biz Úkimettiń 2022 jylǵa arnalǵan is-qımyl josparyna saqtandyrý syıaqylaryn sýbsıdııalaý normatıvin 60-tan 80 paıyzǵa deıin ulǵaıtý usynysyn engizdik, barlyq qajetti materıaldardy Qarjy mınıstrligine jiberdik. Sondyqtan biz jyl sońyna deıin aýyl sharýashylyǵy malyn saqtandyrýdy qoldanamyz jáne keler jyly egin sharýashylyǵynda 80 paıyz iske asyrylady dep oılaımyz. Biraq tájirıbe kórsetip otyrǵandaı, sýbsıdııalaý men saqtandyrý syıaqylarynyń joǵary paıyzy da saqtandyrýdyń keńinen taralýyna kepil bolmaıdy. Sol batys elderiniń tájirıbesine súıene otyryp, egin men aýyl sharýashylyǵyn saqtandyrýdy memlekettik qoldaý sharalarynyń basqa túrlerin alý úshin qajetti sharttardyń biri retinde qoldaný qajet», - dedi E. Qarashókeev.
