Qazaqstanda agroónimderdi óńdeıtin 30 zaýyt salynady
TARAZ. QazAqparat - Tarazda QR Premer-Mınıstri Baqytjan Saǵyntaev pen ońtústik óńirlerdiń ákimderiniń, QR Aýyl sharýashylyǵy birinshi vıtse-mınıstri Qaırat Aıtýǵanov, sondaı-aq argobıznes salasynyń ókilderiniń qatysýymen ótken jıynda 2017-2021 jyldarǵa arnalǵan AÓK-ti damytýdyń memlekettik baǵdarlamasynyń júzege asyrylýy talqylandy, dep habarlaıdy «QazAqparat» HAA.
Qazaqstanda agroónimderdi óńdeý jol kartasy boıynsha 17 zaýytty jańǵyrtyp, odan bólek 30 jańa zaýyt salý qarastyrylǵan. Sondaı-aq, Jambyl, Qyzylorda, Almaty jáne Ońtústik Qazaqstan oblystarynda agrarlyq ónimderdi qaıta óńdeý kásiporyndaryn ashý kózdelgen. Olar sút óńdeý, qant, et óńdeý, maı shaıqaý, teri óńdeý, bıdaıdy tereń óńdeý zaýyttary bolmaq.
Jalpy alǵanda, QR Aýyl sharýashylyǵy birinshi vıtse-mınıstriniń aıtýynsha, Qazaqstanda aýyl sharýashylyǵy salasynda ósim - 2,1%. Áýelde 326 kooperatıv qurý josparlanǵanymen, 745 kooperatıv qurylǵan. Olar 56 myń sheke sharýashylyqtyń basyn qosyp otyr.
Bıyl júrgizilgen aýyl sharýashylyǵy daqyldarynyń egis alqaptaryn ártaraptandyrý jumystary suranysqa ıe daqyldardyń alqabyn 1 mln 348 myń ga-ǵa ulǵaıtýǵa múmkindik berdi. Osylaısha bastyrylǵan dándi-daqyldar kólemi 2,7%-ǵa ósip, 22,1 mln tonnany qurady.
44 myń tonnadan astam sút jáne 13 myń tonnadan astam et daıyndalǵan, bul bıylǵy kásiporyndardyń sút óńdeý boıynsha júktemesin 60-tan 65%-ǵa deıin, etti 55-ten 60%-ǵa deıin ulǵaıtýǵa múmkindik beredi.
Sondaı-aq, barlyq ońtústik óńirlerde mal sharýashylyǵy ónimi óndirisiniń ósimi baıqalady. Búgingi tańda 10,4 myń tonna et, 34,5 myń tonna sút jáne 12,3 myń tonna jemis-kókónis ónimderi daıyndalǵan. 10 aıda ońtústik óńirler boıynsha negizgi azyq-túlik ónimderiniń óndiris kólemi 0,7%-dan 200%-ǵa deıin artqan.
Eske sala keteıik, QR Premer-Mınıstri Baqytjan Saǵyntaev jumys saparymen Jambyl oblysynda júr.
Buǵan deıin Úkimet basshysy «Atameken» Kásipkerler palatasynyń Óńirlik keńesi múshelerimen kezdesý ótkizip, Ónimdi jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan, «Bıznestiń jol kartasy 2020», ındýstrııalyq aımaqtar men monoqalalardy damytý baǵdarlamalaryn iske asyrý máselelerin talqylaǵan bolatyn.
