Qazaqstanda agroónerkásip ónimderiniń eksporty 3 mlrd dollarǵa jetti

NUR-SULTAN. QazAqparat - Qazaqstannyń agroónerkásip kesheni ónimderiniń eksporty 3 mlrd dollarǵa jetti. Bul týraly búgin Aqordada QR Qaýipsizdik keńesiniń janyndaǵy Sarapshylyq keńes otyrysynda Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Sońǵy 5 jylda aýyl sharýashylyǵy ónimderi óndirisiniń kólemi 1,4 ese ósip, 3,1 trln teńgeden 4,5 trln teńge deıin, al azyq-túlik ónimderi 1,1 trln teńgeden 1,6 trln teńge deıin jetti. Bul rette agroónerkásip keshenindegi eńbek ónimdiliginiń ortasha jyldyq ósim qarqyny shamamen 20 paıyz boldy. AÓK ónimderiniń eksporty 15 paıyzǵa artyp, 3 mlrd dollarǵa jetti. Import - 17 paıyzǵa tómendedi. ıAǵnı 2014 jylǵy 4,5 mlrd dollardan bıyl 3,5 mlrd dollarǵa deıin azaıdy», - dedi mınıstr.

Osy oraıda ol azyq-túlik ónimderiniń qaýipsizdigin qamtamasyz etý máselesi fıtosanıtarlyq, veterınarlyq jáne sanıtarlyq sharalar, tehnıkalyq retteý arqyly retteletinin aıtty.

«Aýyl sharýashylyǵy ónimderin jáne azyq-túlik taǵamdaryn óndirý azyq-túlik qaýipsizdiginiń quramdas bóligi ekenin atap ótken jón. Mınıstrlik fýnktsıonaldy azyq-túlik qaýipsizdigin qamtamasyz etý máselesin jeke dara sheshýge múmkindik bermeıdi. Ekonomıkalyq qoljetimdilikti qamtamasyz etý úshin halyqtyń tabysyn arttyrý, satý naryqtary men logıstıka máselelerin keshendi sheshý qajet», - dedi S.Omarov.